Maudi Bernadina por ta biba na Hulanda su curazon ta keda den Caribe. Ta mira esaki claramente den su pinturanan, unda cu cada bes e toque di e islanan Hulandes den Caribe ta resalta.
El a lanta na Corsou di tata Curasoleño y mama Hulandes. Tabata un tempo cu a keda graba den su mente y curason. Cu su 20 aña el a bay Hulanda. Pero a bolbe Corsou bek poco tempo despues, unda cu el a keda cinco aña, prome cu el a subi avión y a bay Madre Patria.
Su laso cu Caribe no a kibra, pasobra mientras cu e ta biba na Hulanda, banda di su trabou, el a dedica un gran parti di su tempo na fundacionnan cu ta traha pa ciudadanonan procedente di Corsou, Aruba y e otro islanan Hulandes den Caribe. E tabata haci esaki cu hopi amor.
Pero na 2016 el a tuma un decisión cu a cambia su bida. El a dicidi di haci algo pa su mes, pa su curason sinti bon. Mi no tabata kier a traha of duna tempo pa cosnan pa otro hende, pero haci algo pa mi mes. Asina el a cuminsa pinta.
Pinta ta algo cu semper e tabatin den su mes. For di mucha caba, pero nunca a hacie di un forma intenso y continuo. El a cuminsa pa haci esaki banda di su trabou. Pintamento tabata tuma un gran parti di su tempo. Den e pinturanan ta ilustra e cosnan típico di e islanan. “Si mi bay Noordzee mi no ta haya e awa blauw cu mi ta custumbra di mira na e islanan. P’esey mi ta miho mi no bay. Mi ta corda e awanan bunita blauw, esnan mas blauw di mundo.”
E ta forma parti di un grupo cu ta consisti di artistanan, biba na Hulanda pero procedente di diferente parti di mundo. Tin diez persona cu ta forma parti di e grupo aki. Aña pasa a tene un exposición na Gouda. Esey a sosode net prome cu e lockdown.
Luna pasa e grupo a tene un exposición na Den Haag. El a presenta un serie di e casnan ilustrativo di Corsou. “Mi gusta e arquitectura.” Tin un pintura cu ta e blachinan di mata di druif cu ta manera bula sali for di e pintura. Hopi di e bishitantenan ta reconoce e tema di e pintura, pasobra nan a yega di bishita Corsou y Aruba. Pero tambe tin hende cu ta confundi e casitanan cu esnan di Hulanda mes cu ta mescos, pero e colornan ta diferente.
E ta trahando intensivo riba otro composición, cu tin di haber cu esclavitud, e historia di Tula. E tema aki ta un búsqueda cultural y no por lubida cu su generación di pasado tambe ta bini di esclavitud. E kier duna e tema aki un espacio den su creacionnan. Mi kier crea poco tranquilidad pa mi mes, cu mi pensamentonan ta riba un pintura. Ora cu mi mira e pintura, mi pensamento ta bay 40 aña atras.”
E ta bisa cu Aruba ta inmensamente bunita, pero e ta corda cu tur caminda tabatin boternan di cerbez of otro tipo di boternan tira. P’esey semper ora cu e sali cu su tata, ta bay cu un saco y recoge e sushinan aki. E lo kier pa e hendenan ta mas conscienter riba e tema aki. Loke tin na e islanan aki ta masha bunita, y mester siñan mantene bunita. Percura pa tin suficiente bari pa tira sushi rond.
