Dia 1 di yüli 2022 e impuesto nobo di turista ta drenta na vigor pa tur bishitante di Boneiru. Den e ordenansa tin deskribí ku mester usa e sènnan ku kobra den nan totalidat pa nos kamindanan, stimulashon di peska i pa desaroyo sostenibel di turismo na Boneiru.
Ku e sistema aktual di kobransa di impuesto di turista tur aña Boneiru ta keda sin haña miónes di dòler. Nan no ta kobra e ‘roomtax’ i e impuesto riba hürmentu di outo kompletamente òf nan no ta kobra ni entregá nada di esakinan. Esaki ta krea un desigualdat grandi entre esunnan ku sí ta entregá e impuesto ku nan kobra i esunnan ku no ta hasi esaki. Tur e miónes ku Boneiru ta keda sin haña ta sènnan ku por usa pa proyektonan ku nos poblashon tin benefisio di dje.
E impuesto nobo di turista ku ta drenta na vigor entrante 1 di yüli 2022 ta bai remplasá e ‘roomtax’ i e impuesto riba hürmentu di outo.
‘Ku e impuesto nobo di turista nos ta ferwagt di risibí mas òf ménos 8 mion dòler na entrada èkstra pa aña. Nos ta bai invertí e entrada total ku nos ta ferwagt di e impuesto di turista entre otro den mehorashon mas rápido di e kamindanan na nos isla. Lo stimulá partisipashon di nos poblashon den turismo pa medio di entre otro treinen ku komo meta pa hisa e salarionan den e sektor akí. Tambe nos lo tin ku bai repartí e preshon ku turismo ta trese kuné riba nos isla, pa di e manera ei kuida e identidat boneriano. Peska tambe lo haña un estímulo, kaminda kombinashon ku turismo tambe ta posibel pa krea entrada èkstra pa nos piskadónan lokal. E promedio di loke e turista ku ta bishitá Boneiru ta gasta tambe por subi’, segun diputado Hennyson Thielman.
Aktualmente ta trahando ku tur e partidonan enbolbí riba un wèpsait ku ta duna informashon tokante e impuesto nobo di turista pa Boneiru. Riba e wèpsait akí lo por haña tur informashon i tambe e opshonnan pa pago di e impuesto di turista. E impuesto nobo di turista di $ 75,- pa persona ta bira bálido entrante 1 di yüli 2022. Mucha te ku 12 aña i habitantenan di e anterior Antia Hulandes ta paga $ 10,- pa persona i studiantenan ku un finansiamentu di estudio di BES ta haña dispensashon. E ‘headtax’ aktual pa turistanan krusero di $ 3,50 pa persona entrante 1 di yanüari 2023 ta keda remplasá pa un impuesto di turista di $ 10,- pa persona, ku e kompania krusero ta entregá pa tur e pasaheronan.
Bishitantenan di nos isla por paga e impuesto nobo di turista akí online. Nan por hasi esaki promé ku nan biahe pa Boneiru òf na yegada na nos isla. Esaki ta konta tantu pa nos aeropuerto komo nos haf. Meimei di luna di yüni Entidat Públiko Boneiru den estrecho koperashon ku Tourism Corporation Bonaire (TCB) ta bai duna informashon adishonal. E ora ei ta anunsiá ki dia e wèpsait i e opshonnan korespondiente pa pago ta disponibel. Si promé ku e tempu ei ya kaba bo tin pregunta, e ora ei tuma kontakto ku Tourism Corporation Bonaire òf Entidat Públiko Boneiru, departamento di Finansa na +599 717 5330.