Mr. Ormel, Deken di Ordo di Abogado a trece un punto masha interesante dilanti. Esaki a sosode durante e discurso cu el a duna na momento di instalación di e presidente nobo di Corte Comun di Husticia mr.Mauritsz de Kort.
No ta awo pero pa basta tempo caba ciudadanonan ta keha cu e proceso den Corte ta tarda masha hopi mes. Un caso civil facilmente lo por dura un aña of mas, solamente den prome instancia. Imagina cu si un di e partidonan no ta di acuerdo y dicidi di bay den apelacion. Mientras tur e tempo aki ta pasa e partido cu ta un comerciante ta keda sumamente perhudica. Su inversion ta keda paralisa y Caha di Gobiero ta perde di haya entrada.
Tanto na Aruba como na otro paisnan Hulandes den Caribe Hulandes no ta problema pa yega Corte. Pero cu esey no tur cos ta bisa. Ormel a enfatisa cu acceso na Corte no mester ta solamente facil,pero tambe efectivo. E ta papia specificamente aki di e proceduranan cu e ciudadano ta encamina y cual mester cuminsa y finalisa den un termino relativamente facil cu un veredicto of areglo. “Aki ta unda e dolor ta wordo sinti,” el a bisa. El a duna un ehempel hopi recien cu Abogadonan a pasa aden. E rol di casonan civil di fecha 10 di mei a laga nan hopi preocupa. “Esaki ta algo cu ta sosode hopi ultimo tempo y nos por a compronde cu pa Corsou e no ta diferente tampoco.”
El a splica cu riba e fecha aki tabatin 40 caso poni riba rol pa un decision pero pa nan sorpresa den 33 caso a pospone e veredicto pa un otro fecha. Riba dje, pa hopi di e 33 casonan aki no ta prome biaha cu a pospone e veredicto. E situacion aki ta demostra cu por lo menos 66 persona (of compania) ta keda pa mas tempo den incertidumbre. Entre nan tin negoshi, pero problemanan of diferencianan di opinion familiar, of caso di diferencia di opinion entre bisiñanan.
Cu proceduranan ta dura largo no ta bini solamente door di tardansa di parti di Hues. E ta admiti cu abogadonan tambe tin algo di haber cu esaki. Abogadonan sa uza cualkier oportunidad pa pidi pospone un caso, pasobra semper tin un otro caso cu ta mas urgente. Hopi biaha abogadonan ta coopera cu coleganan tambe pa uitstel pasobra “bo no sa nunca ki dia mester di su ayudo ora cu abo mes mester di un uitstel den otro caso”.
Posponemento cada rato ta percura pa retraso. Pero e ta kere cu Abogadonan mester tene cuenta tambe cu e posibilidad pa yega na un areglo, cu ta preferibel riba esun dicana e caminda pa Hues. Den un situacion di conflicto, e partidonan tambe mester tuma mas responsabilidad pa nan problemanan. Asina por ehempel, por purba e procedura di Mediation, prome cu yega te na Corte.
Pues logra husticia no ta keda den man di un hues so, pero cada un por contribui na logra esaki.
Pero e problema no ta sinta solamente den casonan civil. Tin hopi caso penal bieu cu apenas den e simannan aki ta bay wordo atendi. Entre otro casonan di 2017 y 2018 cu e mesun acusadonan no a ni corda mas riba nan. Antes casonan penal tabata un biaha pa siman, riba diabierna. Despues el a cambia pa dos bes pa siman, diahuebs tambe. Awo de bes en cuando e ta tres biaha pa siman. Esey ta bisa tur cos.
