Wardakosta a detektá un kontakto sospechoso den serkania di Kòrsou. Sentro operashonal di Wardakosta rápidamente a dirigí e helikòpter na e sitio. Despues di a detektá e go-fast riba laman e helikòpter a risibí asistensha di e cutter Jaguar i un boto patruyero Metal Shark di Wardakosta.
Riba e go fast tabatin tres hòmber, dos Colombiano i un Dominicano. Despues di intersepshon di e go-fast unidatnan di Wardakosta a hiba esaki na e pir. Aki a resultá ku e hòmbernan tabata transportando paketenan ku probablemente droga. Despues di investigashon a resultá ku enbèrdat tabata trata di droga. E tres hòmbernan ademas di e paketenan di droga a keda entregá na Kuerpo Polisial di Kòrsou, pa investigashon den e kaso aki. E kargamentu di mas ku 1.000 kilo di kokaina entretantu a keda destruí.
