Aruba a keda den shock. Unda husticia a keda, otronan ta puntra. Unda cos a bay fout. E fout sigur no ta den man di Hues, cu ta e ultimo di e cadena cu ta ricibi for di OM loke cu e team di Recherche a logra investiga. Si esaki no ta cumpli cu ley exii, e no por bay di acuerdo cu un demanda di castigo. Esaki ta loke a pasa den e caso di Poentje Castro.
No ta e fiscal mes tampoco, pero su hefe ta esun cu ta dicidi si e procesverbaal tin suficiente material di prueba pa hib’e dilanti mesa verde.
Den e caso di Poentje Castro for di tempo cu e crimen a tuma luga, e Fiscal encarga no a sinti pa hiba e caso dilanti pa motibo cu ta mira cu tin hopi buraco den e investigacion. Pero pakico no a duna instrucción na Recherche e tempo ey kico pa haci pa logra haya mas prueba, no ta conocí. E consecuencia ta cu awe tin un sentencia cu ta laga e único sospechoso bay liber. Y famia di e victima Poentje Castro cu hopi pregunta.
Anderson Rasmijn
Dia 23 di december, 2010 a haya Poentje Castro tira den cura di su cas. A instala un team special, cu no a duna e resultado spera pasobra loke cu a produci na evidencia no tabata suficiente pa detene Anderson Rasmijn, según fiscal a bisa e tempo ey.
Dies aña despues a uza e mesun evidencianan, cu un procesverbaal original cu a perde, a dicidi di hiba e caso Corte, coriendo un riesgo cu Hues por laga e acusado liber.
Fiscal a keda insisti cu asesinato premedita (moord) ta proba pa cual, hunto cu otro acusación, a pidi un castigo di 16 aña.
Sentencia di Hues dia 24 di mei den oranan di atardi, a mustra cu Fiscal a asumi mucho. Pasobra e tabata den bisindario y a mir’e ta core, e ta esun cu a mata Poentje Castro. Pero no por a señale dilanti cas di e victima. Tampoco a demostra cu e tabatin un arma den su man. E mester tabata core camino pa por a staciona su auto te dos caya schuin mas leu di e caso, bay te na cas di e victima, warda te ora cu e Sali paf opa recoge su auto y stacione den cura, pa e bula su dilanti y tir’e mata. Y despues core hopi rápido pa yega su auto bek. Tur esaki den un lapso di mas o menos 10 minuut.
Hues no a comprende tampoco di con ta papia di asesinato premedita y no ta duna e motibo cu e acusado Rasmijn tabatin pa mata Poentje Castro. No tin ningún declaración cu el a haci e menasa aki y pa ki motibo. E acusado mes a nenga di a mata pero si ta admiti cu a bay cumpra droga den e área ey. El a core pa motibo cu e tabatin droga den su poder y no sa si nan por ataca’e pesey.
Testigonan a scucha scooter, pero no a investiga esaki.
Tur loke ta para den e sentencia ta mustra cu tin hopi indicación, pero tin duda den tur loke a bini dilanti. No solamente mestrer proba e delito legalmente pero Hues mester ta convenci cu e homber ey ta esun cu a mata. Den e caso aki Hues a conclui cu tin duda. P’esey a declar’e liber.
Ministerio Publico ta bay evalua e caso aki, si nan ta apela. Probablemente esaki lo tuma luga pasobra no por bisa of laga un sentencia den un caso asina grandi pasa sin mas. Si ta bay haya mas evidencia den e tempo nos dilanti ta duda pasobra demasiado tempo a pasa caba.
Caso asesinato di Poentje Castro ta keda cu hopi pregunta
