Dianan 15 pa 23 di mei último, komishon di salú di Parlamento a hasi un bishita di trabou na Colombia tokante e tema di cannabis medisinal. E biahe a kuminsá na Bogotá ( sentro di Gobernashon di Colombia) kaminda e komishon a keda risibí dor un delegashon multidisiplinario di e diferente ministerionan i departamentonan di Gobièrnu ku ta enkargá ku henter e kadena di cannabis medisinal for di optené lisensia, kultivo, kontrol di kalidat, industria te na eksportashon.
Durante di e enkuentronan aki e komishon por a eksperensiá kon henter e proseso di lei a kana na Colombia for di 2017 i kon esaki formalmente a keda ehekutá, pero tambe e diferente desafionan i kambionan nesesario atraves di tempu i asina saka lo makismo di e bunita industria aki.
Aktualmente Colombia tin 15 mil hèktar di kultivashon, kaminda 17.5 persona pa kada hèktar ta haña trabou for di kultivo te laboratorio ( sin e trabou nan indirekto).
Na Bogotá e bishita ofisial a konkluí ku e Minister di Salubridat i bienestar sosial Dr.Fernando Ruiz Gomez Promé ku e delegashon a sigui pa Medellin, kaminda a bishitá un kultivo di Cannabis ,QualCann na Bogotá. E bishita aki tabata realmente un eksperensia úniko kaminda por a tuma nota di e invershon for di kultivo te ku e proseso di zeta di CBD bou di normanan di kalidat ku e keda hasí na e empresa aki.Tambe tabata interesante pa opservá na QualCann kon e parti komersial di simia, ta un parti importante di desaroyo di e sektor aki.
Na Medellin nos a bishita un konsepto bunita “Siembra viva” di akrikultura unda dos hòben bankero a disidi di bai kultiva orgánikamente i alabes sostené agrikultornan ku nan distribushon i enseñasa kon pa por kultiva mas sostenibel ku por ehempel kompost kompletamente orgániko.
Despues na Medellin nos delegashon a bishita otro tipo di kultivonan mas chikitu ku invershonnan konhuntamente pa por traha mas efisiente ku rekursonan finansiero. E biahe di trabou a kontinuá ku bishita na e ekspo di BizzCann, kaminda tabatin e diferente oradornan di taya internashonal i lokal ku a presenta tópikonan interesante di Cannabis medisinal dilanti.Esnan ku resaltá sin duda tabata esun di Dra.Sandra Carillo kende a trese dilanti kon e uso di cannabis medisinal sientifikamente por aportá na bida na e ser humano i dignidat di hende dor di suministrá CBD pa dolónan króniko ,epilepsia, kuido kalitativo di pashèntnan terminal di kanser dor suminstra di un dòkter ku a keda formá riba e materia aki, i no manera aktualmente meskos ku na Kòrsou ta permití tur tipo di zeta di CBD keda importá sin konosementu nesesario.
Otro orador veterinario a splika kon efisiente e uso di CBD den kuido di animal na momento ku suministrá esakinan korektamente.Otro tόpiko tambe interesante tabata e asina “pharma economics” ku ta mustra kon mundialmente Gobièrnunan ta gasta miónes na remedinan di doló ku ta duna efektonan sekundario ku por kondusí na morto ,miéntras ku por spar miónes usando Cannabis medisinal suministrá pa dòkternan i spesialistanan i asina baha gastunan di uso di remedinan di doló i tambe redusí e efektonan sekundario ku ta afektá salu.
Mientras den e èkspo tabata tin eksposishon di diferente produktonan produsi ku CBD ,for di sèrbes te na kòsmetika, pero tambe henter e industria di “vape” ku aki na Kòrsou tambe kresiendo.
Komo Parlamentario responsabel tabata sumamente importante pa por a risibí asina tantu informashon edukativo na nivel, riba e tema di cannabis medisinal.Awor ta na Gobièrnu pa sigui ku e proseso di lei den Parlamento i asina konhuntamente nos krea un sektor nobo ekonómikamente, i alabes kontribuí na salú di nos komunidat.
