Tin un gran diferencia ora hende ta kere den nan mes, y nan no ta kere den Dios, e forsa di hende nunca por logra compara su mes cu e Poder di Dios.
E Fe di un persona den Dios por logra salba su Bida, su Cas, Famia, y hasta un Pais.
Oracion constante na Dios den nomber di Cristo Hesus tin poder pa:
Kibra baranca, Tumba muraya.
Desvia malicia, Kibra cu maldad.
Derota malesa, Fustra plan diabolico.
Para violencia, Para guera. Corre cu demoño.
Cancela buheria y santeria, y mas cu tur cos Sera boca di adversario.
Nos tin hopi ehempel di oracion, pasobra oracion ta nifica comunica cu Dios, y roga Dios su intervencion den caso caminda nos no ta mira solucion pe.
E mundo aki ta yena cu jaloezie, envidia, malicia, pasobra Bijbel ta avisa nos tur locual nos ta mira sosode actualmente den 2 Timoteo capitulo 3 vers 1-9. Y pa hende por compronde nos mester sigi ripiti constantemente, pa asina haci tur hende consciente di e tempo den cual nos ta bibando, y con nos tin di haci oracion.
Den e buki di Daniel capitulo 6 vers 1 -28 nos por lesa y siña con nos mester trata cu cierto situacion den nos bida, ora hende lanta contra nos, pa nos no lanta contra hende, manera hende ta pensa cu mi mester defende mi mes , pero nos mester pone e caso den man di Dios.
Daniel no tabatin defensa terenal of carnal manera hende por bisa , pasobra esnan cu a lanta contra djE pa motibo di su Fe den Dios, tabatin tur forsa y autoridad pa caba cune, y nan tabata yena cu malicia..
Asina ta pa motibo di su Fe den Dios nan tabata persigi Daniel, y mas nan tabata persigi Daniel , mas Daniel su oracion tabata crece.
No ta importa cuanto hende bo por tin contra bo, e por ta un ejercito, tene na cuenta cu ejercito di Angelnan di Dios ta mas grandi cu cualkier ejercito di mundo, y ta capaz pa tumba y vence tur pensamento humano.
E decision a cay pa tira Daniel den cueba di Leon pa motibo di su Fe den Dios, pero prome cu Daniel a wordo tira e mesun Rey cu a firma e decreto cual tabata irrevocabel a bisa Daniel den vers 16:Bo Dios cu bo ta sirbi constantemente , E mes lo librabo.
Ora nos tin Fe den Dios hasta nos enemigonan lo ta na paz cu nos, pasobra ora nos tin Fe Dios ta papia pa nos.
Palabra di Dios ta siña nos pa drenta den nos camber di mas paden, papia cu Dios den secreto y e lo contesta nos den publico.
Hopi situacion delicado, y duro ta presenta den Famia, tin hopi atake ta bini for di e malbado, di cual hopi biaha nos no ta prepara pe , pero nos Fe den Dios ta nos defensa, pasobra nos tin di corda cu Dios ta creador di tur cos.
Nan a dicidi di tira Daniel den cueba di leon, pero locual nan a lubida of nan no tabata sa cu e Dios di Daniel ta e creador di tur leon, y E ta e Leon di Juda.
Nos ta pidi Señor cu tur leon cu lanta contra bo cas y bo Famia bira pushi chikito den nomber di Cristo Hesus.
No ta importa e grandura di e problema, of situacion , bo Fe den Dios ta conta.
