TCB ta informá
Komo parti di e Tourism Recovery Plan, Tourism Corporation Bonaire (TCB) a lansa un kampaña nobo i amplio di branding ku enfoke riba merkado norteamerikano. TCB a kuminsá ku un inisiativa robusto di branding pa reposishoná Boneiru, refreská su identidat i introdusí nos isla di nobo serka e merkadonan di enfoke mas importante. Un di e metanan komo parti di e plan ta pa: ‘REPOSISHONÁ BONEIRU DEN KARMONIA KU NATURALESA I NOS HENDENAN’. TCB ta spera di inspirá e suidadano mundial ku e siguiente karakterístikanan di un biahero: Eco-Conscious Traveler (biahero konsiente di medio ambiente), Adventure Traveler (biahero aventurero), Volunteer Traveler (biahero boluntario) i mas. E suidadano mundial tin un bista global i ta konsiente di bunitesa ku mundu ta ofresé. E ta komprendé ku e tin ku aktua pa eksperensiá e bunitesa akí pa su mes i pa futuro.
Ku lansamentu di e kampaña nobo di branding TCB lo implementá su strategia 100% digital tambe. For di awor TCB lo invertí solamente den posibilidatnan di branding i merkadeo digital i pokopoko lo stòp ku propaganda tradishonal imprimí. #sostenibilidat
E merkadonan di enfoke mas importante pa loke ta trata e merkado norteamerikano ta entre otro Florida, Connecticut, Illinois, Indiana, Michigan, Minnesota, New Jersey, Ohio, Pennsylvania, Wisconsin, New York, Atlanta i Houston i Toronto, Canada.
Banda di esaki lo ofresé e strategia komersial di TCB tambe komo parti di e kampaña di branding nobo. Den koperashon ku American Airlines TCB lo lansa un kampaña di konsientisashon pa stimulá e lunanan entre high i low season, ku enfoke riba Canada i Merka. Na kuminsamentu di luna di yüni Expedia ta lansa tambe un kampaña kreativo pa Boneiru den koperashon ku e programa di Bonaire Bond. Na honor di e reservashonnan ku a hasi via Expedia Bonaire Tourism ta planta vários palu di koral via e programa di Bonaire Reef Renewal.
Partinan di e kampaña lo ta enfoká riba e kultura outéntiko di Boneiru, aktividatnan riba i den laman, sambuyamentu, eksperensianan kulinario, nos ambiente trankil i prinsipalmente nos hendenan. Durante e kumbre anual di turismo ku ta planiá pa luna di sèptèmber 2022 lo kompartí un resúmen kompleto di resultadonan di e kampaña. Ku lansamentu di e kampaña TCB ta introdusí tambe su promé ‘landing page’ nobo titulá www.Bonaireisland.com. Riba e plataforma digital akí bishitantenan por deskubrí i siña mas tokante Boneiru. Den verano di 2022 ta lansa e wèpsait nobo i kompleto di Boneiru, nèt na tempu pa sirbi komo inspirashon pa biahamentu den e temporada di wenter binidero.
