Prome Minister Evelyn Wever – Croes reuni cu Parlamento pa trata e recorte di salario di empleadonan publico y semi-publico cu pronto lo stop. Den cuadro di esaki, tin algun condicion cu Hulanda a stipula cu mester cumpli cu ne. Como cu no ta tur di e condicionnan aki ta den man di Gobierno, a acerca Parlamento pa haya sa si nan ta bay di acuerdo cu esakinan.
Meta di Gobierno desde siman pasa diabierna cu a yega na acuerdo cu Hulanda encuanto e recorte salarial ta, pa percura cu empleadonan publico y semi publico por haya e 5% cu nan ta entregando di nan salario mensual na juli venidero y asina haya nan salario 100%.
Pakico e ta imortante pa trata esaki cu Parlamento?
Hulanda a pone algun condicion riba mesa cu mayoria ta den man di Gobierno (cual Gobierno por cumpli cu nan), pero tin algun cu no ta den man di Gobierno. Den e cuadro aki, Prome Minister a expresa cu e ta importante pa splica Parlamento di e situacion y cu ta Hulanda a pone e condicionnan aki.
Un di e condicionnan ta, cu e recorte di 25% di Parlamentarionan mester continua. Pa loke ta esaki, algun miembro di Parlamento a puntra kico lo pasa si no kier pa e continua. Prome Minister a bisa cu eorey lo informa Secretario di Estado Van Huffelen di esaki y lo mester busca un otro manera pa e placa ey yega den caha di Gobierno. Pero no lo permiti pa esey stroba e trahadonan di haya nan placa bek.
E otro condicion ta trata di e Wever – Croes norm. E Ley ta encera un maximo/ ‘cap’ di salario di directornan di companianan estatal na 130% compara cu salario di Minister. E ley actualmente ta na Parlamento, y den caso cu Parlamento no bay di acuerdo cu e ley, Prome Minister lo mester splica Secretario di Estado Van Huffelen di e situacion. Ta trata di un cantidad maximo di 10 director cu no ta den cumplimento cu e ley, y no ta haya cu nan mester perhudica entre 3000-4000 trahado. “Hecho ta, cu desde cu a drenta den Gobierno nos ta aplicando e 130% di salario di Minister pa tur directornan nobo cu a wordo apunta”, Prome Minister a splica.
Algun pregunta di Parlamento
Prome Minister ta lamenta cu algun Parlamentario a opta pa expresa nan opinion pafo di Parlamento durante cu e reunion aki tabata andando, enbes di a delibera hunto riba nan puntonan di preocupacion. Un di e puntonan treci dialnti ta cu algun Parlamentario kier pa e 12.6% wordo otorga completamente na juli y no solamente 5%. Premier Wever – Croes a splica cu ya Gobierno a inclui e 5% den e presupuesto pa 2022 entrante 1 juli 2022. AVP a bay contra di esaki ora cu a trate den Parlamento. “Si AVP di berdad tabata kier 12.6%, nan mester a hinke den Presupuesto, of por cambia e presupuesto ‘alsnog’. Pero na e momentonan aki, Aruba por carga 5% cu ta presupuesta.”
Un otro punto treci dilanti pafo di Parlamento y cual Prome Minister a ricibi preguntanan di dje durante e reunion tabata: Con Corsou y Sint Maarten ta bay hacie?, Prome Minister a contesta cu actualmente ta den deliberacion/ consulta cu e islanan riba e tema aki pa mira con por cumpli cu e condicionnan. Pa locual ta e situacion na Aruba, Premier Wever – Croes a bisa cu Aruba ta adelanta cu cumplimento di e condicionnan. Aruba tin e 5% inclui den Presupuesto, a bay di acuerdo caba pa e recorte di 25% cerca Ministernan continua, y ta wardando riba decision di Parlamento. Banda di esakinan ta na caminda pa trata e ley pa maximalisa salarionan den companianan estatal.
Por ultimo, Prome Minister a expresa cu e reunion a bay bon y ta gradici Parlamento pa a acepta e reunion asina liher. A haya bon pregunta di Parlamentarionan cu a mustra di ta hopi interesa den e topico. Na e momentonan aki Parlamento ta den deliberacion pa tuma un decision acerca di e condicionnan. Si nan no acepta e condicionnan, Gobierno lo encamina un otro ruta, pa Hulanda toch permiti pa paga e 5% aki na juli. “Na fin di dia, Parlamento y Gobierno kier e mesun cos, cual ta pa empleadonan publico haya nan placa bek,” Premier Wever – Croes a termina.