Nos hobennan ganador ta cla p’e ? Falta solamente algun dia mas, pa e gran final di e competencianan bunita y sano di “Arte di Palabra” cu lo tuma lugar na nos isla ruman Corsou Diasabra 28 di Mei 2022. Cu mas streanan bunita pa nos islanan ABC. Boso shine !!!!
Tur e ganadornan den nan catagoria cu nan bunita inspiracion. Ta cua isla lo tin e ganador of ganadora maximo e anja aki ! Aruba, Boneiro of Corsou ? Tur lo duna di nan maximo sigur ! Ta hopi talento a bolbe sali padilanti riba nos islanan ABC den “Arte di Palabra”, cu a nace na Corsou for di e bunita curason inspira di sra. Ange Jessurun y cu despues a contagia sanamente y positivamente Boneiro y Aruba . Un di e motor y curasonnan den organisa y ehecuta e competencianan den Arte di Palabra Aruba, como tambe prepara e hobennan den nan talentonan mihor expresa, ta nos colega Poeta y artista multifacetico Jhon Freddy Tobon Montoya, cu ya tin hopi pero hopi logronan riba su nomber, di entre otro, skirbi cancionnan pa nos festival di Un canto pa Aruba den luna di Maart, como ganador varios biaha caba di e competencianan den Poeta Patria, e ta e man drechi den setup di decornan fantastico den Cas di Cultura di tur artista, bailador y of musico. Y asina nos por sigui menciona. Den e team di DCA hunto cu Jhon Freddy nos tin tambe lieve Julie Merencia, John John Flemming y otronan cu tambe ta traha profeshonalmente cu curason pa e progreso y adelanto di nos cultura.
Y riba e terreno di Arte di Palabra, riba nos dushi idioma, nos lenga materno Papiamento. Lady Ruth ta kere cu pa’wor ya e handbagnan di nos hobennan ganador di Aruba ta cla caba, y ta wardando e dia yega di bula bai Corsou, pa ta na tempo pa dia 28 di Mei , un bunita Diasabra mainta riba cual esnan mas fuerte den nan presentacion di Arte di Palabra lo bay midi forsa cu otro y na e mesun momento inspira otro cu nan temanan impactante, educativo . Un danki diki gordo ta bay pa lieve Julie Merencia, cu lo ricibi den mi nomber mi premio “Tapushi Literario” 2022, cu ya nos a skirbi di dje den un di nos relatonan anterior. Nos ta sumamente contento cu e premio, cu nos a hanja pa e bon trabaonan cu nos ta hasi pa cu nos dushi idioma Papiamento,e.o. e publicacion di buki, recita poema, relatonan den corant etc. DANKI Arte di Palabra Aruba, masha danki pa kere tambe den nos como un baluarte di Papiamento.
Nos ta desea tur nos participantenan ganador di tur tres isla tur clase di exito den e gran final di Arte di Palabra, “May the best ones win”, mientras cu nan tur ta un ganador riba nan mes pa a expresa di nan talentonan den nos lenga materno Papiamento. Nos ta desea henter e team di Aruba un bon biahe, y pa goza di e periodo cortico pero impactante na nos isla ruman Corsou.
Segun nos a comprende, e gran final lo ser pasa riba you tube y telecuracao y of face book tambe. Nos no ta corda si ta e mesun dia of despues. Danki pa lesa nos relato di awe cu hopi atencion, amor y carino. Sigui cuida curpa y “stay safe”. Love you too ! Pasa un dushi dia yen di sabiduria den nos alegria ! Dios ta bon. Dios semper ta bon . Laga nos tambe corda bisa Dios danki pa salud, nos dak riba cabes, cuminda riba mesa, amor, pasenshi, sabiduria, alegria, y pa cada dia regala na nos. Awe nos relato dorna pa picsnan di Arte di Palabra Aruba.April 2022,saca den Cas di Cultura, e final na Aruba,cu algun di e ganadornan cu lo bay representa Aruba .Diasabra dia 28 di Mei den oranan di mainta na nos isla ruman Corsou.
Hobennan talentoso, hopi exito na Corsou !
