Nashonnan Uní a proklamá 22 di mei komo ‘Dia Internashonal di Biodiversidat’ (World Biodiversity Day). Ku ‘biodiversidat’ nos ke men e total di tur tipo di mata i bestia den naturalesa. For di investigashon a resultá ku no ta bai bon ku naturalesa na Boneiru. Afortunadamente Reino huntu ku nos gobièrnu lokal a formulá un plan di aserkamentu pa trese kambio den esaki.
Na aña 2017 sientífikonan di Universidat di Wageningen a emití un rapòrt tokante e situashon di naturalesa na Boneiru. Nan konklushon tabata ku situashon di biodiversidat na nos isla ta moderá te desfavorabel. E investigadónan ta pensa tambe ku e velosidat ku biodiversidat ta birando ménos kuné, por lo pronto lo no baha òf stòp. Ekstinshon di sierto espesienan i redukshon di biodiversidat ta konsekuensia di kambionan den nos ambiente di biba. Nos mes ta kousa e kambionan akí, òf nan ta konsekuensia di prosesonan natural.
E menasanan mas importante pa naturalesa na nos isla ta: bestia ku ta kana lòs, mata i bestia eksótiko ku ta hala e espesienan endémiko un banda, kambio di klima i kalidat di awa di laman (sobrefertilisashon). Desaroyo di kosta, eroshon i piskamentu eksesivo tambe ta kousanan importante. Kousanan rekonosibel di deterioro di naturalesa na nos isla ta por ehèmpel buriku i kabritu ku ta kana lòs, espesienan eksótiko manera ‘lionfish’ i pushi di mondi. Nos rikesa natural tin un forsa di atrakshon grandi riba turista. Sin naturalesa no tin turismo i sin turismo no tin un ekonomia ku ta floresé. Nos ta biba di naturalesa.
Na aña 2020 Reino i e entidatnan públiko konhuntamente a formulá e Plan di Maneho pa Naturalesa i Medio Ambiente 2020 – 2030 pa kambia rumbo di e tendensia negativo akí. Pa esaki Reino a pone sèn disponibel. Di e manera akí nos por tuma medida pa sostené i protehá nos biodiversidat. Reino, pero Boneiru tambe, tin un obligashon pa hasi esaki a base di e Tratado tokante Diversidat Biológiko. I e Dia di Biodiversidat ta kòrda nos riba esaki.
