Durante e prome encuentro di Gabinete Wever-Croes II cu hefenan di departamentonan di Gobierno, personanan cu ta encarga cu presupuesto na cada departamento y esnan encarga cu maneho di personal, Prome Minister Evelyn Wever-Croes a dirigi palabranan di gradicimento na tur hefenana di departamento di Gobierno pa e manera cu nan a traha hunto y e esfuersonan haci durante e crisis di Covid-19 cu retonan y circumstancia dificil y asina mes a wanta e motivacion halto den nan empleadonan.
E ta hopi importante pa hefenan di departamento, cu mi ta considera e management di aparato gubernamental, ta na haltura di tur informacion y pa nos ta alinea y tin e mesun posicion financieramente. Bisando esaki mi kier pidi cooperacion di cada un di boso pasobra ta asina so nos por sali di e pandemia y e lo no ta facil pero tampoco imposibel.
Como ex hefe di deparatmento, mi ta na haltura cu e tipo di reunionnan aki ta esunnan mas dificil pa asimila. Bo tin deseonan, bo ta sinti e presion di bo organisacion tambe riba bo y bo mannan ta mara y esaki ta un sentimento hopi dificil.
Gobierno ta reconoce cu e posicion cu cada hefe di departamento tin aworakinan, ta un tarea hopi dificil y nan ta atendiendo cu n’e miho cu nan por posibel. E ta bay ta dificil, e tabata dificil caba pero no imposibel. Aruba a yega di pasa den cosnan pio pasobra e pandemia mi ta kere tabata e prueba di mas grandi pa cada un di nos y bosonan.
Tin biaha mi ta puntra mi mes dicon ta toca net nos den e temporada aki, pa ta guia organisacionnan. Pero mi tin un fe grandi, mi sa cu Dios tin un plan pa nos cada un p’esey nos cada un ta yama pa ta akiden aworaki. Mi kier a gradici bosonan pa tur e esfuersonan haci durante e pandemia cu circunstancianan sumamente dificil cu e ansha y panico cu tabata tin, boso a logra wanta e motivacion bou di boso personal. Nos por wak atras na un periodo cu hopi orguyo cu nos a logra hopi hunto.
Nos ta reconoce cu tin hopi reto pero apesar di esaki nos tin cu tuma un decision, nos por laga e retonan surpasa nos, sinta man crusa y no haci nada, pero mi ta kere nos niun akiden kier haci esey. Of nos por hinca mas energia, mas esfuerso, busca e pasenshi y motivacion pa nos por toch realisa nos metanan.
Aña 2022 nos a decreta como Aña di Inversion y Oportunidad. Ban puntra nos mes con nos cada un por contribui na e meta di e aña aki. Talbes con nos por mehora e servicionan di gobierno mas pasobra sin e inversionnan aki nos no ta sali di e pandemia aki tampoco. E ta haci si cu nos mester bay pensa out of the box. Nos tin cu realisa cu business as usual manera nos tabata traha pa maneha nos organisacionnan, no ta un opcion mas. Nos mester ta mas critico den nos procesonan di trabou di cada dia. No ta pasobra semper nos a haci’e un manera, nos tin cu sigui haci’e asina.
Mi kier pidi pa nos cada un bay weita con nos por cambia nos procesonan di trabou, haci’e mas senciyo, mas lihe, claro semper kedando den e cuadro legal. Mi kier pidi tambe pa nos motiva nos empleadonan tambe pa yuda nos pensa con nos por cambia nos procesonan pasobra t’e unico manera cu nos por bay bek den normalidad sin cu nos mester corta asina tanto den nos presupuestonan”.
