Diaranson 18 di mei 2022, a tuma luga un dialogo participativo organisa pa Ministerio di Asuntonan Economico, Comunicacion y Desaroyo Sostenibel. Un grupo grandi consistiendo di mas di 45 organisacionnan local y mas di 100 participante a forma parti di discurso publico, cu e meta di intercambia nan ideanan pa por logra yega na un economia circular. E grupo diverso a consisti di companianan semi-gubernamental, sector bancario y financiero, instancianan academico, gremionan y representantenan di comercio chikito y mediano (SME’s).
A cubri cuater topico esencial, entre otro; siguridad di cuminda; awa di bebe; energia; y infrastructura sostenibel (built environment). E participantenan a ser reparti den grupo pa asina cada uno comparti nan idea di con pa logra ta mas sostenibel encuanto e diferente temanan.
Minister Wever ta anticipa cu for di e session aki lo ricibi feedback valioso cual lo ser analisa pa inclusion den su plan di “Circular Economy Action Plan”, actualmente den produccion.
Economia Circular ta mas cu un terminologia, berdaderamente e ta fundamental na Aruba – como un isla – su sobrevivencia pa futuro. Reduccion di dependencia internacional ta e enfoke di e discussion: con Aruba lo por sostene su mesun ciudadanonan si acaso nos no por depende di importacion? Pero tambe como manera di enrikese mas nos mesun economia enbes di laga nos divisanan (placa) flow bai bek pa exterior.
Kico ta economia linear? Ta importa cuminda, fossil fuels pa energia y pa awa, y tambe ta importa materialnan di construccion. Na final, tur e recursonan aki ta ser uza, desecha y ta end up den nos landfill, por ehempel. E proceso aki ta cuminsa di nobo door di importa di nobo.
Kico ta economia circular? Por pensa riba desaroya di capacidad local di agricultura, pa subi produccion local. Uzo extenso di energia renobabel manera solar y biento, no solamente pa energia pero tambe pa produci awa. Construccion mester por tuma lugar den un forma caminda por asembla un edificio por ehempel, y desasembla esaki den futuro pa sea haci’e mas grandi, of cambia e proposito di e edificio y asina acapara e hende y recursonan necesario. Den construccion e meta ta pa reduci – te casi elimina – e desperdicio di bloki, cement, palo y otro materialnan cu simplemente awo ta yega na un dump.
Minister Wever ta contento cu e participacion activo, y di e acohida cu evento aki tabata tin. E ta forma un parti esencial na e forma di “Interactive Policy Making” cu e kier promove, y ta forma parti di un esfuerzo mas amplio pa por realisa cambionan legislativo necesario. Un gradicimento ta bai na tur participante, minister y parlamentarionan cu a atende.
