For di e siman akí por skucha e djengel pegahoso nobo di ‘Sembr’awe pa kosechá mañan’ di Salubridat Públiko na radio. Ku e djengel ta rekordá siudadanonan musikalmente riba e importansia pa kome fruta fresku i bèrdura fresku tur dia.
Bèrdura i fruta fresku ta parti di un estilo di bida salú. Un estilo di bida salú ta importante pa prevení malesa di durashon largu manera sobrepeso serio, problema ku kurason, diabétis. Salubridat Públiko ke stimulá siudadanonan tambe pa kuida nan mes bon. E departamento ta kai bou di e direktorado Komunidat i Kuido.
E direktorado akí ta dirigí su mes entre otro na kombatimentu di pobresa na Boneiru. Si siudadanonan planta nan propio bèrdura i fruta esaki no solamente ta salú. Pa hendenan di ménos rekurso, ta un manera pa nan mes yega na kuminda.
Ito Martis a komponé e djengel nobo ‘Sembr’awe’. Durante e programa ofisial di selebrashon di Dia di Rincon por a skucha e djengel akí pa promé biaha. Muchanan a balia riba e músika, miéntras Gedion Kroon a rèp den esaki.
‘Sembr’awe pa kosechá mañan’ ta forma parti di e programa ‘Bèrdura i Fruta’. Na 2018 e departamento a kuminsá ku esaki. Meta di e programa akí ta pa mustra komunidat riba importansia di planta i kome bèrdura i fruta. E kampaña ‘Sembr’awe pa kosechá mañan’ ta kana for di 2019.
Den kurso di tempu a traha spòt di radio i video kòrtiku pa esaki. Den pasado e departamento a partisipá na ‘Taste of Bonaire’ ku ‘Taste of Health.’ E kampaña tabata kana bon, pero pa motibu di COVID-19 a para esaki temporalmente. Ku
lansamentu di e djengel nobo ta rebibá e kampaña.
