Tin cu ta yama’mi Dr. Ruth, pa e temanan cu mi sa cubri y expresa di nan den mi poemanan. Nan ta sinti un cu nan y ta hanja cu mi palabranan bibo ta inspira nan. Esey ta e trabao sentimental di tur Poeta, tur escritor. Pa hiba’bo den nan mundo bunita di sentimentonan liber y bunita.Tin biaha hasta den nan dolor y of sufrimento. Tur Poeta ta manera un Dr. den palabranan bibo cu ta pone’bo sinti y pensa. Podise algun por cherche y pensa cu Lady Ruth ta kere cu e sa masha hopi cos den bida. Wel, claro cu nos no sa tur cos, ningun hende sa tur cos, pero pa nos yega e edad di 65 anja aki un luna, nos mester ta yena cu hopi les di bida, hopi experiencia cu , cu e anjanan a acumula hopi conosemento y sabiduria, toch ? Nos no ta competi cu ningun hende of Poeta, nos ta traha riba nos mes pa mehora nos mes cada dia. Nos tur ta den movecion constantemente y mi no ta papiando di e movecion fisico. Nos tur sa tambalea den nos balans di bida tin biaha y tin cu sa mas cu mi y tin cu sa menos cu mi. Ta algo normal. No ta tur hende a bini na mundo pa bira dokter of pastoor.
Cu Lady Ruth ta wordo invita pa duna un curso chikito di Poesia pa e compania Skills Awe Aruba , ta algo hopi bunita. Pakiko ? Pasobra niun hende a nace como
e “Don sabe lo todo”, pero cu nos experiencianan di skirbimento for di mi 16 anja di edad, ta algo caba pa papia di dje y yega na skirbi poema prosa haiku etc. Dios mediante nos tin cosnan bunita pa comparti y inspira esnan interesa den e curso aki, cu lo ta 4 x 2 ora riba Diabierna cuminsando Diabierna dia 8 di July , pues den e luna di Juli venidero ariba e Diabiernanan den e luna di vakantie, cu por stimula hobennan y adultonan claro, cu kier sa mas con nos a cuminsa y yega na publica 4 buki. Mas cu claro nos ta bay expresa nos mes den poema.
E curso lo ta diferente, estilo a la Lady Ruth. Pa mas informacion por yama Skills Awe Aruba na telefoon 593 3044 . Pa e 4 biahanan di 2 ora cada un, ta pidi un contribucion di Afls. 185,- y pa cada tomo separa di 2 ora, pa esnan cu no por bin tur 4 Diabierna, pero por bin un of dos di nan, esaki ta bira Afls.50,- pa cada biaha.
E cuponan ta limita, pues, si bo ta interesa den bin participa den e curso aki di skirbi poema, bayla cu palabra, si abo tambe kier sa mas di e forma den e arte di palabra aki, y pasa algun oranan hunto den explora bo mesun talento den skirbimento, bo curashi pa expresa , por cuminsa inscribi yamando tel: 593 3044 ,nos ta warda’bo na Skills Awe Aruba , Tanki Leendert 241 Acropolis Bldg Suite 7 . E Ultimo dia pa inscribi y paga e participation fee ta dia 1 di July. Esnan cu ya conose e arte di skirbi tambe ta mas cu bon bini, nos por tende bo banda di medaya tambe cu hopi amor y carino. Bo tambe por inspira nos sigur . E orario lo ta den oranan di atardecer pa anochi, no laat, pues, si abo ta un mama hoben adulto cu un yui teenager cu lo hanja leuk pa participa na algo asina, just jama e telefoon menciona. Keda sorpresa kiko tur lo por sali bayla den forma poetico. Y…..no spanta ! E poemanan no mester rima tur biaha. Mas liber expresa, mihor ! Esaki no ta un concurso of competencia. E beyeza di cada persona ta sali for di curason ! “If it’s meant to be, it’s meant to be”. E curso aki, Dios mediante, duna pa Lady Ruth, ta algo positivo, creativo, bunita, interesante y simpel.
Shonnan, danki pa a permiti nos drenta bo hogar y curason atrobe cu nos relato di e siman aki, sigui cuida curpa, “Stay safe”, love you too ! Nos simplemente kier a aporta cu algo mas di hasi den vakantie scol pa nos hobennan cu ta gusta hasi cosnan positivo y sinja algo mas.
Y ken sa, cu bo sigui expresa bo mes den poemanan cu un dia lo bira un buki , un tesoro di bo sintimentonan di temanan cu ta toca curason.
