Dia 12 di mei ta marka e fecha di nasementu di fundadó di Enfermeria moderno, Florence Nightingale. Ta p’esei, rònt mundu, awe ta para ketu riba e fecha aki ku mundu di Enfermeria ta selebrá. Aki na Kòrsou no ta diferente, pasobra nos tambe ta para ketu i reflekshoná un biaha mas riba e trabou ku Enfermeronan ta hasi, sigur den e pandemia aktual. Tur aña di nobo tin konferenshanan internashonal, kaminda ta selebrá e Dia Internashonal di Enfermeria kaminda ta para ketu riba e kontribushon importante ku Enfermeria ta duna na sosiedat rònt mundu.
Riba e dia spesial aki, Minister di GMN, dr. Dorothy Pietersz- Janga a bishitá nos CMC i diferente kas di kuido komo muestra di gratitut pa e gran trabou ku nos enfermeronan ta ehersé. Primeramente Minister Pietersz- Janga huntu ku Minister Presidènt señor Gilmar Pisas a bishitá CMC kaminda despues di e parti ofisial e mandatarionan a hasi un rekorido den diferente departamentu i despues e dos mandatarionan a bishitá Birgen di Rosario. Minister Pietersz- Janga a sigui pa Huize Hugenholtz i parti atardi e minister di GMN a bishitá Ricardus Tehuis, Departamentu Salú Hubenil i G&Gz.
E resepshon na tur e kasnan di kuido tabata kaluroso i tur enfermero a risibí un bunita flor komo muestra di gratitut i apresio. Awe dia 12 di mei 2022 por bisa ku na Kòrsou tambe nos tin hopi Florence Nighingale, pasobra nos sa ku e atenshon, e dedikashon i e amor ku kada un Enfermero di Kòrsou ta duna, ta un aporte sigur pa yuda e pashènt i su pais. Durante e pandemia di Covid-19 Kòrsou su Enfermeronan a demostrá ku nan ta di un kalidat haltu i huntu nos mester traha pa sigui mehorá kuido aki na Kòrsou. Pabien na tur esnan ku ta laborá den Enfermeria.
