A ofresé e suma na e fundashon komo sostén pa e promé firmanan pa The Bonaire Bond
Riba Dia di Mama Tera Tourism Corporation Bonaire (TCB) ofisialmente a lansa ‘The Bonaire Bond’, un promesa di destinashon ku ta invitá bishitantenan pa firma un akuerdo pa biaha na un manera responsabel pa durante e añanan binidero konservá e forsa natural di atrakshon di Boneiru. Pa duna inisio na e inisiativa nobo i importante akí, nos isla a primintí pa en kambio di esaki adoptá ref di koral via Reef Renewal Foundation Bonaire (RRFB), na nòmber di tur bishitante ku a firma e Bonaire Bond den su aña inougural.
A lansa Bonaire Bond den koherensia ku e di 10 aniversario di e promé kultivo di koral di nos isla ku na aña 2012 Reef Renewal Foundation Bonaire (RRFB) a instalá. Awendia mundialmente nan ta rekonosé RRFB pa su resultadonan tangibel di restorashon, su desaroyo kontinuo i eskalashon di su téknikanan, e tremendo enbolbimentu di nos komunidat i e determinashon pashonal pa ehersé un impakto positivo riba e refnan di koral di Boneiru.
Pa selebrá e dos logronan importante akí, TCB a entregá RRFB un promé donashon di $1000 na nòmber di e promé firmanan di Bonaire Bond durante e evento di e di 10 aniversario di e organisashon riba djarason 11 di mei.
Durante e dékada tras di lomba e fundashon a sigui krese i evolushoná, i awor akí ta trahando riba renobashon di shete sorto di koral ku ayudo di dos diferente téknika pa distribuí miles di koral ku tur aña stratégikamente nan ta planta riba refnan lokal afektá na Boneiru. Aktualmente tin mas ku 11 kultivo di koral na Boneiru, ku ta hospedá mas ku 15.000 koral di 75 diferente tipo di koral. For di aña 2013 nan a planta mas ku 41.000 koral riba kasi 9000 m² di ref di koral. Por atribuí e éksito di e programa di RRFB na un kombinashon di trabou práktiko, enbolbimentu di komunidat, edukashon di hóbennan i kolaborashon ku organisashonnan ku ta enfoká riba investigashon. RRFB tin 9 ‘dive shop’ lokal ku ta sirbi komo embahador edukativo pa programanan di restorashon di Reef Renewal Bonaire i tambe sentronan di entrenamentu pa boluntarionan.
E promesa nobo di destinashon lo sirbi tambe komo un instrumento di ayudo edukativo pa bishitantenan tokante kon pa komportá nan mes na un manera sostenibel i pa trata e refnan vulnerabel ku rèspèt. Ta enkurashá bishitantenan pa no solamente firma e promesa digitalmente, pero pa kumpli kuné tambe, riba www.BonaireBond.com.
