Bonaire Cruise Tourism Association (BCTA) ta preokupa i disapunta riba e komunikashon di gobierno i e trato pa ku e turismo krusero na Boneiru. Después di a partisipa na varios okashon den dialogo ku gobierno kon pa adapta e Plan di Rekuperashon (PdR) ku OLB a presenta na 2021 sin partisipashon di e sektor krusero, BCTA tabata positivo mirando ku diputado Thielman a duna di konose di lo
ahusta e Plan di Rekuperashon (PdR) of miho bisa e Plan di Likidashon pa asina preveni resultado nan desastroso pa e komersio local.
Nada no ta berdat, diputado Thielman no a kumpli ku loke ela priminti. Ela bolbe hinka e kuchu den e ekonomia local i tur e empresarionan ku ta biba di e turismo krusero. Na april 2022 ultimo, na konferensia di Seatrade na Miami ela informa tokante e Plan di Rekuperashon sin e kambionan. Den otro palabra ela informa e Plan di Likidashon.
Esnan ku a lesa e Plan di Rekuperashon, lo a ripara ku tin diferente incentivo i plaka disponible pa e sektor hotelero (menos impuesto, bentaha riba impuesto ora di renovashon, proseso rápido di permiso pa hotelnan nobo, subsidio pa merkadeo di hotelnan et cetera.) Esaki ta un kontraste riparabel si kompare ku e sektor krusero. Den e plan ta para ku lo korta den e sektor krusero na Boneiru. Ku otro palabra e Plan di Rekuperashon ta traha pa sektor hotelero pero e ta un Plan di Likidashon pa e sektor krusero.
E pregunta grandi ta; Dikon ta likida e komersiante lokal chikitu den sektor krusero huntu ku e plan aki? I dikon e plan aki ta wordu ehekuta tog después ku diputado Thielman a duna di konose ku lo ahusta e Plan di Rekuperashon aki pa asina evita un desastre den e sektor krusero?
Tambe den e plan di subi e impuesto turistiko por mira un kontraste riparabel. E turista krusero lo hanja un subida di 300% pa día ariba e asina yama ‘headtax’ mientras e turista ku ta bishita via avión no ta hanje. E ta hanja un impuesto fiho ‘flat rate’ pa su bishita kompleto. Dikon duna e turista ku ta bin via avión un diskuento di impuesto i e turista via barku ta subi’e ku 300%?
Según BCTA e Plan di Rekuperashon tin algún elemento bon den dje pero ku ta konta solamente pa e sektor hotelero! BCTA ta rekonose ku e sektor krusero na Boneiru mester mehora puntonan logistiko di kual na e momentonan aki ta trahando riba nan pero e Plan di Rekuperashon no por ta asina ku ta likida e sektor krusero enbes di yude. E konsekuensia di e likidashon di e sektor krusero
no a tene kuenta kune ora di a traha e Plan di Rekuperashon. Tampoko a pone atenshon na e miyones nan ku a wordu inverti a base di e STMP 2017-2027 (Plan Strategiko di Turismo) ku gobierno a introdusi prome ku nan a bin ku e Plan di Rekuperashon aki.
E invershon nan aki no por wordu rekobra si e Plan di Rekuperashon (Likidashon) aki wordu ehekuta sin e kambionan adekuado. BCTA ta enfatisa ku e sektor krusero a wordu gaña den e tantísimo dialogo nan ku a priminti di ahusta e Plan di Rekuperashon.
Pa resumi, e sektor di krusero na Boneiru lo no eksisti mas si e Plan di Rekuperashon wordu ehekuta sin e kambionan necesario. Es mas por sugeri ku e sektor di krusero deliberadamente ta wordu likida ku perdida grandi di trabou den un sektor ku ta hopi difisil
kaba. BCTA ta indika di tin zero komprendementu pa e delegashon di gobierno enkabesa pa diputado Thielman ku tabata na Seatrade, Miami na April ultimo kaminda nan ta bisa den un komunikado di prensa ku gobierno tabata tin bon kombersashon ku e kompanian di krusero. Realidat ta otro e kompanianan krusero ta mal kontentu i ta etika e plan nan deskonsidera i nan no a spera di un socio valioso ya pa añanan. E liña krusero nan ta sinta warda awo ja ku no tin nada riba papel ainda pero a indika di keda leu foi Boneiru si
e plan nan realmente wordu implementa.
A pesar di e promesa nan sin kontenido di diputado Thielman, ta parse ku OLB lo bai implementa e Plan di Likidashon pa e sektor krusero. E implementashon di e plan aki ta sinti mane un kuchu den lomba di parti gobierno pa e komersiante nan lokal. Si OLB ta pretende di likida e sektor aki, gobierno mester ta konsiente di e konsekuensianan tambe. Hopi kompania ta kla pa kobra gobierno tur e sen pa daño finansiero i perdida di likides pa e plan aki!