Awendia hende ta biba pa biba, y casi no ta corda riba Dios. Ta parce manera ta nan mes ta dicidi tur cos, te ora malesa of necesidad grandi presenta.
Cuanto hoben nan mayornan ta papia cu nan tur dia tocante nan comportacion, pero e ta drenta di un horea y sali pa otro horea.
Stop di huma marihuana. Stop di usa porkeria. Stop di cana laat riba caya tur dia. Aparta for di e gang cu bo ta den dje. Cuidao pa bo tambe no ta cana cu arma. Ta auto di ken bo tin atrobe? corda cu bo no tin rijbewijs. Mi no kier polis na mi porta. Si bo sigi asina bo ta duna mi atake di curazon. Pakico bo ta bebe asina tanto. Bo no tin berguensa.
Tur esaki ta palabra di mayor cu tur dia tin di hala atencion di nan yiu.
Ora un hoben ta obediente na Dios y su mayornan ta bon pa su mes, pasobra locual hopi no ta kere bijbel ta splica nos cla cu den obedencia tin bida largo, y cu esaki ta duro ora nos ripara dicon tin hoben ta keda na mitar di caminda, sea nan ta benta na futuro afo. of mas tristo ainda ta perde nan bida.
Hobennan tene cuenta cu esaki:
Proverbionan capitulo 3 vers 1+2 ta bisa: Mi yiu no lubida Mi siñansa, ma laga bo curazon warda Mi mandamentonan.Pasobra dianan largo, bida largo y pas nan lo agrega na bo.
Hoben esaki ta palabra di Dios pa bo bida, pa bo cana den obedencia na Dios y bo mayornan.
Proverbionan capitulo 3 vers 16 ta bisa; Bida largu ta den su man drechi, y rikesa y honor ta den su man robes. Esey ta pa bo hoben ora bo ta obediente na Dios y bo mayornan.
Proverbionan capitulo 4 vers 10 ta bisa: Tende mi yiu y acepta Mi palabranan y e aña nan di bo bida lo ta hopi. Hopi mayor no sa cu nan tin cu splica nan yiu esaki, pasobra no ta posibel cu un yiu ta obedece Dios y e ta rebeldia contra su mayor, tin algo cu no ta bon.
Proverbionan capitulo 9 vers 11+12 ta bisa : Pasobra pa medio di Mi bo dianan lo wordo multiplika, y añanan lo wordo añadi na bo bida. Si bo ta sabi,ta pa bo mes bo ta sabi,ma si bo haci bofon, ta bo so lo carga esaki Hoben den desobedencia no tin ningun ganashi.
Proverbionan capitulo 10 vers 6 ta bisa: Tin bendicion riba cabes di e husto, ma violencia ta tapa boca di e malbado. Wak bon como hoben bo mes lo ripara dicon bo ta den problema constant, y no ta ningun hende contra di bo, pero bo desobendencia ta hinca bo den problema.
Proverbionan capitulo 22 vers 4 ta bisa; Recompensa di humildad y e temor di Señor ta: rikesa honor y bida. Bo obedencia na Dios ta habri porta pabo tur caminda den bo bida, pasobra lo bo ta decente, integro y di bon caracter, lo bo ta un hoben ehemplar,y un mentor pa hopi.
E obedencia na Dios mester ta completo, pasobra mitar obedencia ta un insulto pa Dios, pasobra Dios a duna nos bida completo pa obedece, pero ora desobedencia drenta, nos bida por wordo corta.Pesey nos mester arepenti y drecha cos cu Dios.
Bo obedencia na Dios y bo mayornan lo duna bo exito spiritual, mental y fisico..