E bunita y dushi competencianan sano entre nos hobennan di scolnan secundario, alumnonan di ensenanza avansa, “ARTE DI PALABRA” ta den full swing, desde 2 luna pasa caba. Maart y April 2022 a conose hopi hoben talentoso atrobe, kendenan mientrastanto a midi forsa poetico, creativo y inspirativo contra otro hobennan riba nan isla, den e competencianan pre final riba cada isla, pa dia 28 di Mei venidero participa den e Gran Final di Arte di Palabra entre e ganadornan di e tres islanan ABC. E curason cu ta guia e hobenan na Aruba, ta e.o. Jhon Freddy Montoya cu hopi amor y lieve mooie Julie Merencia, di Dept. di Cultura DCA.
Lady Ruth a presencia e presentacion di Aruba den luna di April den Cas di Cultura y a keda impreshona con hopi talento tin entre nos hobennan, cu ta “durf” subi stage y declama, recita of conta un storia cortiko, hasi un rap of papia den haiku, cu ta impacta cada curason. E anja aki ta di 23 anja cu e competencianan den e dushi actividad aki “Arte di Palabra” ta wordo organisa pa y na nos ruman isla Corsouw, cu a inspira Boneiro y Aruba pa tambe tene e competencianan aki. Na Aruba e anja aki tawata e di 13 biaha. Tur anja Arte di Palabra ta rindi homenahe na persona/instancia na Aruba, Boneiro y Corsouw cu ta duna un contribucion balioso riba tereno di nos idioma Papiamento. Ki bunita gesto ! Un tremendo estimulo sigur sigur !!
E anja aki, 2022, e baluartenan scogi pa Comishon Arte di Palabra di cada isla ta : Aruba : Sra. Ruthy Vrieswijk-Bergen, Boneiro Sra. Emma Sint Jago y pa Corsou Sra. Bianca Neman y Sra. Bernadette Heiligers-Halabi. Mientrastanto ya a entrega e premio, e Tapushi Literario, na Bianca y Bernadette na Corsouw durante pre final na luna di April y dia 28 di Mei venidero durante e gran final di Arte di Palabra na Corsouw lo entrega e Tapushi Literario na Ruthy y Emma, y si nan no por ta presente personalmente, un representante por accepta esaki den nan nomber. Tawata un dushi sorpresa pa Ruthy dia cu ela ricibi e bunita email cu e informacion y invitacion. Lady Ruth ta super contento y agradecido cu su “Tapushi Literario” cu lo hanja un lugar special den su hogar, su skina cayente na unda e ta sinta skirbi despues di inspira su poemanan. Pa motibonan familiar e no por ta presente personalmente, pero si den mente, alma y curazon. Nos bunita amiga di Departamento di Cultura Aruba, e simpatico Julie Merencia, lo hasi nos e fabor di ricibi e Tapushi Literario y bisa un dos palabra den nos nomber. Mientrastanto nos a wak on line y of ariba facebook hopi di e hobennan di Corsouw cu nan bunita presentacion, atrabes di un bunita grabacion fantastico di e gran cabayero profeshonal Hermanito Narvaez di Corsouw na e.o, Telecuracao. Por a siguiele tambe riba you tube. Nos por a goza y admira tambe e centenares di picsnan bunita saca pa e fotografo profesional y di curason David Homoet. Danki cu nos tambe por a goza un crenchi di e bunita competencianan y danki cu nos por publica algun pics di esakinan. Skirbiendo e relato aki, Lady Ruth ta sinti su mes mas serca di Arte di Palabra den su totalidad. E ta contento di por a wak y topa un biaha algun anja pasa na Aruba cu lieve Ange Jessurun, pero ta spera di por topa cu Ange, Mervina , Emma, Bianca y Bernadette den futuro sercano nos bebe un koffie y combersa y inspira otro un crenchi mas !
Danki lieve Ange y comishon Arte di Palabra riba tur tres isla. Danki beautiful Lady Ange Jessurun pa a inicia, crea y realisa e bunita actividadnan aki di Arte di Palabra , cu awor tin su rais bon, bunita, fuerte y firme den nos islanan ABC cu hopi amor y carino pa nos idioma, nos lenga materno Papiamento(u). Danki na tur e instancianan cu ta duna nan aporte financiero pa hasi esaki posibel . Hopi exito, hopi amor pa Diasabra dia 28 di Mei,y “May the best ones win !” Danki pa lesa nos relato cu curason, stay safe, y Love you too “!
Na tur participante den competencianan sano di “Arte di Palabra”, sigui expresa ! Sigui skirbi !
Boso tur ta un ganador ariba boso mes ! Sea boso mes cu respet, amor y aprecio pa boso mes, awe y semper ! Exito den boso estudio ! Duna danki na Dios pa bida, salud, alegria y sabiduria !
Comishon Arte di Palabra, un biaha mas danki, masha danki pa Ruthy su Tapushi Literario 2022. Un gran estímulo pa nos tambe sigui expresa nos mes poeticamente den Papiamento(u).
