Señor Michael Pieters a entregá su retiro pa asina krea espasio pa otro lider den Partido Demokratiko Boneriano haña oportunidat pa reforsá oposishon den konseho insular.
Ta asina ku for di komienso, e idea di partido Demokrat ta pa duna oportunidat na miembronan di e partido ku a sa di profilá na un nivel, pa reforsá e tim ku semper ta krítiko den aspektonan di gobernashon di nos isla. Michael Pieters ta konosí komo un di e pilánan den partido Demokrat i a sa na sostené e lider polítiko Clark Abraham komo un miembro skèrpi i atento.
Esaki no ta nifiká ku señor Michael Pieters lo no ta aktivo mas den polítika, pero mas bien ta tuma un asiento den bèkgrount i un ròl di konsehero pa asina brinda oportunidat na otro miembronan di e partido pa profilá nan mes. Señor Pieters ta keda aktivo tambe komo tesorero di direktiva di partido Demokrat.
Partido Demokrat ke gradisí señor Michael Pieters pa tur su añanan den konseho insular i e bon trabou ku el a hasi. Na mes momento nos ke anunsiá ku señor Daniel “Dany” Crestian lo remplasá señor Pieters den konseho insular. Komo partido nos tin tur konfiansa den abilidat di señor Crestian pa ta krítiko i al kaso i sigur pa representá e pueblo boneriano dignamente. Nos ta deseá señor Crestian tur klase di éksito i nos ta sigur ku e ta bai hasi un bon trabou.