Ku gran satisfakshon Kousa Promé a tuma nota di e posishon balente i sobèrbè di presidente di Parlamentu di Sint Maarten. Na nòmber di parlamentu di Sint Maarten el a informá minister presidente di Sint Maarten ku COHO no ta na fabor i no ta e solushon pa e situashon di Sint Maarten. Pa e motibu aki Sint Maarten no ta sostené COHO. Un posishon ku no ta laga lugá pa duda. No tin konsenso mas na Sint Maarten. Den mésun rosea señora Heyliger ta hasi un yamamentu na parlamentu di Aruba i parlamentu di Kòrsou pa djoin parlamentu di Sint Maarten pa huntu hiba e reforma konstitushonal, hibando e kaso di rekolonisashon ku yama COHO riba un plano mas haltu na Nashonnan Uní. Kousa Promé ta di akuerdo ya ku huntu e tres paisnan lo ta fuertísimo den e bataya riba nivel internashonal kontra e kolonisadó Hulanda. Nos ta hasi un yamamentu spesial na parlamentu di Kòrsou pa sea patriótiko i sobèrbè i djòin e lucha heróiko huntu ku Sint Maarten i Aruba. Huntu e lucha kontra rekolonisashon hulandes lo ta muchu mas fuerte. Un unión di Aruba, Sint Maarten i Kòrsou den Nashonnan Uní kontra Hulanda lo ta inparabel. Ta momento pa para violashon di Karta Magno di Nashonnan Uní, para abuzu di e lei kolonial Statüt, para e tres makambanan ku lo bin goberná Kòrsou. Ta momento pa para enpobresimentu di Kòrsou, eliminashon di lei di retiru, kombertí Kòrsou den un trampolín di Hulanda, falta di rèspèt pa nos kultura, militarisashon di Kòrsou, hulandisashon di nos enseñansa i entrega di nos fuentenan mayó di entrada na Hulanda.
Kousa Promé ta hasi un yamamentu na parlamentarionan di Kòrsou pa yega na votashon riba COHO dia 26 den parlamentu i elimin’é pa semper. A yega e momento pa rekordá i honra Tula, Piar i Brion. Honra nos éruenan i vota kontra COHO i forma un unión den tres pa hiba COHO plenchi. Ta dos kos tin un ta keda. E lucha kontra kolonialismo hulandes ta sigui.