Pa basta tempu kaba sindikatonan a keda ketu. Esei ta e ‘stel’ promé ku un orkan? Nos lo wak. Pero ku un orkan lo bini tardi of trempan, ta sigur. No pa bai bèk na un ideologia bieu ku no por funshoná. Tampoko pa hasi bochincha y kibra tur kos sin sentido. Nò, simplemente pa yega na hustisia sosial, usando método pasífiko. Bonaire mester di dje urgentemente.
Suèldunan ta muchu abou, hür pa kas ta muchu haltu y komestibelnan ta muchu karu. Gobièrnu di Boneiru no ta saka tereno di erfpacht mas, kaminda hende pober por biba sikiera den un kònteiner, pasobra nan no por paga e hürnan haltu mas. Y riba nan propio tereno nan por traha nan propio kas poko poko. Nos gobièrnu a bira loko. Tin mas ku 1.100 hende ku a pidi tereno sin haña.
Hulanda a primintí un ‘Mínimo Sosial’ komo un ‘punto na horizonte’. Ko’i kèns esei ta! Si bo ta purba yega na e punto ei, lo bo ripará ku ta imposibel. Pasobra e horizonte semper ta keda mesun leu. Ku otro palabra, si bo kier hasi un promesa sinsero, e mester ta konkreto.
Dia 5 di mei 2022 sindikatonan ta organisá un Manifestashon pa splika tantu gobièrnu Hulandes komo gobièrnu di Boneiru ku pueblo ta spera mas ku promesanan vago manera ‘puntonan na horizonte’. Mester yega na afsprak konkreto. Por ehèmpel: Dentro di DOS aña suèldu mínimo lo subi te $ 1,400.-, AOV te $ 1,300.- y ònderstant te $ 1,000.-.
Esei ta un promesa ku hende por kere. No ta korekto pa tene hende na liña ku nònsèns.
Sindikatonan tambe ta protestá kontra diskriminashon entre Hulandesnan bibá na Hulanda y Hulandesnan bibá na Hulanda Karibense riba tereno di suèldunan y otro derechonan sosial. Anto atrobe nan tin rason. For di 2010 BES a bira parti integral di Hulanda. E ora ei nivel di tur derecho humano mester wòrdu igualisá. Leinan entre Hulanda y BES por tin reglanan diferente, pero e nivel di derechonan básiko mester ta igual. Esei ta un demanda rasonabel. Pasobra Hulanda y BES tin mesun Konstitushon (Grondwet).
Y kualkier persona ku ta deseá di haña un tereno di erfpacht y tòg ta sigui vota pa MPB/UPB, ta kompletamente loko! Paga tinu! PDB tampoko no ta bisa NADA over di e asuntu di tereno di erfpacht. Y esei no ta straño, pasobra nan tambe semper a hunga mesun wega di patronahe.
Úniko chèns pa Boneiru yega na un nivel sosial akseptabel y na otorgamentu di tereno hustu, ta un partido kompletamente nobo. Tira tur e otronan den sushi numa. Esaki ta e momentu pa un partido polítiko nobo sali dilanti ku su propio vishon y ku un programa basá riba e idea ku siudadanonan ta konta ainda.
