Ora mayor ta haci bon, bon ta bini pa su mes y pa su yiunan, Dios ta fiel, y Dios conoce e preocupacion cu cada mayor tin pa nan yuinan.
E enemigo sa con cansa mente di un mayor y ta pesey Dios tin promesa grandi pa mayor nan y ora nos como mayor kere den Dios e promesa ta bira realidad den nos bida y nos famia.
Den Isaias Capitulo 54 vers 13 Señor ta bisa; Señor lo siña bo yiu hombernan, y e prosperidad di bo yiu hombernan lo ta grandi.
Isaias 26: 3+4 Señor ta bisa : Lo Bo warda den paz perfecto esun cu su pensamento, ta permanece den Bo, pasobra e ta confia den Bo. Confia den Señor pa semper, pasobra den Dios e Señor nos tin un baranca eterno.
Ora circumstancia ta mustra bo algo diferente for di palabra di Dios, bo tin di bay bek na promesa di Dios y afirma bo Fe den dje, pasobra Dios su promesa ta eterno.
Ora bo yiunan ta den mal amistad, of tin relacion cu hende cu no ta cana den bon caminda, y bo sa esey bo mester recorda Señor riba su promesa den Isaias capitulo 49 vers 25 cu ta bisa:
Hasta e catibo nan di e homber poderoso,lo wordo kita for di dje, y e prooi di un tirano lo wordo rescata, pasobra lo Mi pleita cu esun cu ta pleita cu bo, y lo mi salba bo yiu hombernan.
Pasobra Señor tin e poder pa saca bo yiu for di geng di bandido, y libra bo yiu for di man di hende cu ta mundo di scuridad , den asunto di droga y arma.
Den e buki Genesis capitulo 26 vers 5 Dios ta bisa Isaac cu Dios ta bendiciona Isaac pasobra su tata Abraham a obedece Dios. Esey ta para scirbi pa tur hende por mira cu ora nos como mayor haci bon , Bondad lo bini pa nos yuinan.
Dios a mustra misericordia na Salomon, door di hacie rey, cumpliendo asina cu e promesa cu Dios a haci na su tata David. David tabata stima Dios.
Como mayor aunke cuanto placa bo tin na banco y cuanto propiedad bo tin ,toch bo tin e preocupacion con lo para cu bo yiunan, pasobra tur mayor sa cu nada material, no por yuda ora nan yiunan ta den mal caminda, of malesa por ataca nan, pesey Dios ta demanda di tur mayor pa lanta nan yuinan den caminda di Señor.
Poverbionan capitulo 22 vers 6 ta bisa: Instrui e mucha den e caminda cu e mester cana y hasta ora e bira bieuw lo no aparta su mes for di dje.
Pesey como mayor bo tin di busca Dios, y pone Dios na prome lugar den bo bida y den bo hogar y den bida di bo yuinan pa asina proclama lo siguiente :
Isaias capitulo 54 vers 17 : Ningun arma forma contra bo lo no prospera y tur lenga cu lanta contra bo den huzgamento lo bo condena , esaki ta e herencia di e sirbidonan di Señor y nan hustificacion ta bini for di Mi, Señor ta declara.
Nos mester ta sirbido di Señor pa nos por proclama bendicion riba bida di nos yuinan, pa nos por intercede pa nos yuinan dilanti di Dios.
Mas bon nos haci como mayor , mas bendicion lo bini riba nos mes bida, y riba bida di nos yuinan.