Pa: Rudy Lampe, ex minister di Educacion, partido Red Democratico
Den plena Semana Santa nos prome minister ta sigui cu su racha di mentiranan. Dia 12 di april 2022 ta sali riba prome pagina di Amigoe cu e tema di trahador di limpieza di Skoa ta “een administratieve discussie tussen de regering en het schoolbestuur”. A ripiti esaki den Diario, di 12 di april 2022, pagina 15: “debi na un discusion administrativo entre SKOA y gobierno”. Esaki ta un mentira, no ta trata di un discusion administrativo, sino ta trata di violacion di ley, sentencia dos biaha pa diferente huez. Den mesun rosea prome minister ta bisa mas mentira, cu e a saca e carta di 23 di juni 2021 den nomber di ministerraad pa defende trabao di e werksters. Un mentira flagrante y lesa loke mi persona siendo minister di educacion a publica riba e mesun dia di 23 di juni 2021, dos dia prome cu eleccion:
“No tin nada di berdad, Minister Lampe a bisa, cu minister kier kita werksternan for di trabou. Tin un sentencia di Corte riba e tema aki. E prome sentencia ta data di 6 di April, 2020, unda cu Hues a dicta cu SKOA ta actua contra ley. Dia 17 di mei, 2021, un otro Hues a bolbe ripiti e mesun sentencia. A bisa cu a nombra e werksters den condiccionnan contra ley y mester coregi esaki, pero no ke men kita nan foi trabao.
Tin tres ley cu ta rigi maneho di e tres tipo di scolnan cu tin na Aruba di preparatorio, primario te scol secundario (avansa). Y eyden ta para kico ta cay bou exploitatiekosten y kico ta cay bou subsidio di salario. Mantencion y limpiesa ta cay bou exploitatie subsidie pero SKOA a pone werksternan bou post di salario, poniendo nan na e mesun nivel cu ambtenaarnan cu tur e beneficionan cu esaki ta encera. Corte a bisa cu SKOA mester coregi e situacion aki. E leynan no por wordo poni un banda, ni cu un Landsbesluit ni cu decision di un Minister. E unico cos cu SKOA mester a haci, desde e sentencia di aña pasa, ta coregi su PSA y pone e salarionan segun ley. Esaki no ta nifica cu e werksternan mester wordo retira. Hues a reconoce cu Minister di Enseñansa a pone subsidio extra di 1.5 miyon pa e rubro aki, cu ta mas cu loke pa limpiesa di scol otro directivanan di scolnan ta haya. E werksternan por keda na trabao cu un salario, no tin ningun motibo pa kita nan foi trabao. Bisa cu ta minister di Educacion ta insisti pa kita nan foi trabao ta un mentira.
Tur otro directiva ta opera manera ley ta prescribi. E unico cu ta actuando contra ley ta SKOA. Awo cu ta yama un reunion cu werkster pa bisa nan cu ta bay retira nan, no ta nada otro cu un stemadvies. Y durante tur e añanan aki esey nan tabata haci. No ta traha pa interes di werksternan, sino a sirbi un interes politico.”
Tur hende por saca nan mesun conclusion ora lesa mi declaracion di 23 di juni 2021, y e carta di prome minister di mesun 23 di juni 2021 dirigi na Skoa, y te awe prome minister ta sigui cu su mentiranan.