Ta invertí e entradanan den enseñansa, infrastruktura, desaroyo di turismo i inisiativanan di sostenibilidat
For di 1 di yüli 2022 un impuesto di turista di $75 pa kada bishita ta remplasá e aktual ‘room tax’ i ‘car tax’ di nos isla. Ta usa e entradanan pa infrastruktura, e produkto turístiko, esfuersonan ekológiko i enseñansa na nos isla. E impuesto ta aplikabel pa tur no-residente di 13 aña bai ariba ku ta drenta Boneiru. No-residentenan di 12 aña i mas chikitu i habitantenan di e anterior Antia Hulandes tin ku paga $10 pa kada bishita. Ta paga e empuesto obligatorio digitalmente via un plataforma online ku lo ta disponibel dia 15 di yüni 2022, òf na yegada na aeropuerto.
Pa barkunan krusero for di 1 di yanüari 2023 un impuesto di turista di $10 pa kada turista lo bini na lugá di loke anteriormente tabata konosí komo ‘headtax’, i e kompanianan krusero lo ta responsabel pa kobramentu i entrega di e impuesto na nòmber di e pasaheronan ku ta bishitá nos isla.
Anteriormente tabata paga e ‘room tax’ i e ‘car tax’ pa persona pa kada anochi na e akomodashon i na momentu di hür un outo. Awor ku a skùif e responsabilidat fiskal for di e proveedornan di akomodashon i hür di outo pa no-residentenan, e proseso aktualisá di kobramentu a keda bon risibí pa sektor turístiko i segun ekspektativa entrada pa nos isla lo oumentá ku mas di $6 mion pa aña.
Tourism Corporation Bonaire (TCB) ta sostené e akualisashon akí ku a keda desiñá pa strukturá e proseso pa drenta Boneiru pa tantu nos bishitantenan komo pa e partnernan turístiko di nos isla.
‘Ta importante pa nos bishitantenan komprendé ku e suma ku nan ta paga pa drenta Boneiru no ta un impuesto nobo òf adishonal’, segun Miles B.M. Mercera, direktor di Tourism Corporation Bonaire. ‘Simplemente nos ta kombiná nos impuesto di turismo eksistente den un solo kontribushon di destinashon, di manera ku pa mayoria bishitante di Boneiru e ta bira un proseso mas simpel i mas kumbiniente. E ta un invershon importante tambe pa loke ta hasi nos isla asina atraktivo, for di nos esfuersonan ekológiko i nos eventonan kultural te nos komunidat lokal floresiente i kariñoso.’
Djis despues di anunsio di lansamentu di e Bonaire Bond, e promesa di destinashon di nos isla – ku dentro di poko bishitantenan por firma outomátikamente na momentu ku nan paga nan impuesto di turismo – huntu ku e introdukshon resien di e promé Fèstval di Ròm, e kambio akí ta un otro paso pa dilanti den loke te awor ta un aña eksitante i eksitoso pa turismo di Boneiru.
Ademas, for di djárason 20 di aprel 2022, nos bishitantenan no tin mester di mustra un tèst negativo, un prueba di rekuperashon òf un prueba di bakunashon mas na yegada. Tantu biaheronan bakuná komo biaheronan no-bakuná for di tur pais tin ku yena solamente un deklarashon di salú pa por drenta Boneiru.