Durante e reunion di Konseho Insular ku a tuma lugá djamars 12 di aprel último, e lidernan di MPB i UPB a tuma e desishon pa stòp e komishon di Konseho Insular ku ta atendé ku e pandemia di Covid-19.
Loke ku ta kuestionabel i sigur tambe lamentabel pa Partido Demokrat ta e echo ku e dos partidonan den gobernashon a tuma e desishon despues ku e lider polítiko di MPB a bisa esaki na sitionan públiko. Partido Demokrat ta lamentá i kuestioná ku e lider di MPB a bisa ku e presidente di e komishon di Covid-19, ku ta e lider polítiko di Partido Demokrat, Clark Abraham, mester ser kitá i ku e no por ta aktivo mas den Konseho Insular.
Partido Demokrat: ‘nos no sa ku esaki ta e polítika nobo ku e lider di MPB ta praktiká, pero e ta mustra si bon kla ku su polítika NO ta na interes di e pueblo boneriano. Na promé lugá e pandemia NO a bai i te ku siman pasá tabatin mas ku 500 hende ku a tèst positivo. Esaki tin komo konsekuensia ku e porsentahe di hendenan infektá aki na Boneiru, e asina yamá ‘positivity rate’, ta haltísimo. Ademas, Hulanda mes ku ta instruí Boneiru, konstantemente a keda den kontakto ku e komishon di Covid-19.’
Tur esaki ta mustra ku MPB i UPB NO tin e pueblo na pechu, pero ta tuma desishon a base di politikeria. Esaki mientras ku e komishon di Covid-19 di Konseho Insular no ta hasi polítika i pueblo práktikamente no sa mes ku e komishon aki ta eksistí.
Partido Demokrátiko Boneriano ta konvensí ku ta djis pasobra ta Clark Abraham, lider polítiko di e partido, ta presidente di e komishon, e komishon aki mester stòp di eksistí.
Direktiva di Partido Demokrat ta lamentá e desishon aki i ta pone e partidonan MPB i UPB responsabel pa si akaso e kasonan di Covid sigui subi i si esaki resultá den medida(nan) atrobe!
