Dialuna mainta den un encuentro ameno Minister Endy Croes a reuni cu Director di Inspectie Onderwijs di Hulanda, sr. Erik Martijnse, Inspector Financiero, sr. Marlot Zeldenrust, Inspector di Hoger Onderwijs, sra. Susanne Rijken y ‘Onderzoeker’ sra. Arne Leer cu ta di bishita na Aruba den cuadro di e trabounan cu mester wordo haci en conexion cu e ‘Doorlichting van het Arubaanse Onderwijsbestel’. Presente n’e reunion tabata Inspector General di Aruba sr. John Hessen y conseheronan di Ministerio di Enseñansa, sra. Swinda Winterdaal y sr. Ivan Croes. Durante e reunion a elabora riba cuater di e diestres puntonan di recomendacion di e ‘tussenrapport’ cu ya ta den ehecucion. ‘E tabata un bon reunion y nos ta sinti cu Inspectie di Hulanda tabata hopi satisfecho cu e pasonan cu ya caba a wordo tuma’, e mandatario a enfatisa. Inspectie Onderwijs tabatin algun inkietud unda cu tabata desea di haya mas informacion y esaki a wordo brinda na nan. Minister Endy Croes a expresa cu Inspectie Onderwijs di Hulanda a keda hopi satisfecho cu e trabounan cu nos ta haciendo en conexion cu enseñansa.
Director di Inspectie Onderwijs di Hulanda, Erik Martijnse a añadi cu durante siman nan tabatin diferente reunion y nan a mira diferente desaroyo bunita y positivo. Inspectie di Hulanda ta trahando hopi di cerca cu Inspectie di Aruba pa asina finalisa e rapport y introduci tur e cambionan necesario pa cu mehoracion di enseñansa den e fase pa cu reforma. E colaboracion entre Inspectie di Hulanda y Inspectie di Aruba ta hopi bon. E ta un ekipo fuerte cu un dinamica hopi varia combinando experticio di e coleganan di Aruba y Hulanda.
Diabierna ultimo Minister Endy Croes tabata presente durante e reunion entre Inspectie di Aruba, Inspectie di Hulanda y ‘stakeholders’ di e Plataforma Enseñansa y Labor (PEL) den cuadro di e topico di e ‘aansluiting onderwijs en arbeidsmarkt’. Di acuerdo cu sr. Martijnse, presencia di e mandatario a duna hopi balor n’e punto di agenda cu a wordo trata. Sr. Martijnse ta hopi contento cu e sosten cu e Mandatario di Enseñansa a duna. Dialuna mainta Minister Endy Croes a ricibi delegacion di Inspectie di Hulanda unda a elabora riba e ultimo desaroyonan di e rapport manera: maneho di idioma, finansa di enseñansa, leynan di enseñansa y data. Sr. Martijnse a remarca cu e mandatario di Enseñansa ta trahando ya caba riba diferente di e puntonan menciona den e rapport. Sr. Martijnse a enfatisa cu e colaboracion cu Minister Endy Croes ta uno hopi positivo y e tabata un reunion hopi fructifero.
