Recientemente, durante un ceremonia nostalgico di recuerdonan bunita, ARUMIL a celebra nan 25 aña di existencia, den presencia di Minsiter di Husticia y Asuntonan Social Sr. Rocco Tjon. Riba e mesun fecha aki esta, 7 April 1997, e prome grupo di ARUMIL a drenta servicio militar pa pais Aruba. Precisamente 25 aña despues, ARUMIL ta ricibi formalmente nan propio emblema di schouder, creando asina nan propio identidad dentro di e “Defensie Caribisch Gebied”. Esaki ta muestra di e trayectoria exitoso di ARUMIL, pa cual a ricibi e honor special aki. Ademas di a celebra e bunita logro aki, ARUMIL a anuncia e restructuracion oficial di nan organisacion, cual ta duna nan e identidad propio y brinda mas oportunidad na e hobennan di ARUMIL.
Segun Sr. Tjon, ora un hoben ta tuma e decision pa dentra ARUMIL, e ta scoge pa un trabou cu ta brinda siguridad y stabilidad pero tambe e balor di loke ta disciplina, confiansa y union. Esaki a keda demostra durante e pandemia, caminda ARUMIL conhuntamente cu Guarda nos Costa y Cuerpo Policial a traha unanimamente pa patruya y potreha nos fronteranan. Tambe a demostra di duna e sosten necesario na e organisacion di formacion social. E tremendo cooperacion entre e diferente departamentonan aki ta muestra cu union ta haci forsa, y sigur ta algo cu mester percura pa continua awo y den futuro.
Actualmente, e trayectoria profesional di un hoben den ARUMIL ta uno cortico, pues ta trata di un carera di cuater aña, cual por wordo prolonga te na un edad di 30 aña si e hoben desplega un bon trabou. Unabes cu e hoben termina e trayectoria aki, e tin algun opcion cu e por scoge di dje, manera sigui den un otro organisacion militar dentro di Reino, of e por wordo traspasa pa un departamento gubernamental. Den caso cu esaki no ta un posibilidad, por scoge pa drenta sector priva tambe. Segun e mandatario, e “rechtspositie” di e hobennan di ARUMIL sigur ta conta cu e atencion di gobierno di Aruba, pa asina por sondea y crea mas oportunidad pa e hobennan aki unabes nan termina nan trayectoria dentro di ARUMIL.
Por ultimo, Minister Tjon a duna palabra di gradicimento na e comandante y e organisacion di “Defensie Caribisch Gebied”, cual danki na e vision y esfuerso di nan como organisacion, a apoya e modernisacion di ARUMIL, pero mas importante aun, semper a percura pa inclusion di ARUMIL dentro di “Defensie Caribisch Gebied”. Ademas di esaki, a gradici tambe e hecho cu a permiti pa damas por drenta e trayectoria militar pa medio di Formacion Social, cual ta otro prueba mas, di nan vision di inclusion y modernisacion.
