Durante un bishita cortico na Corsou bou invitacion di Partido PAR,
E fin di siman cu a pasa, Lider di MEP señora Evelyn Wever-Croes tawata na Corsou riba invitacion di Partido politico PAR na ocacion di traspaso di mando di liderazgo di e partido. Durante un estadia hopi cortico mes, Lider di MEP a probecha algun bishita y reunion importante.
REUNION CU OBISPO
Wever-Croes a reuni cu Obispo y Pastoor Curtis na unda a toca topiconan interesante entre otro riba enseñansa catolico. Un reunion na unda a ricibi y duna hopi informacion relevante pa ambos pais. Na final, Lider di MEP a haya bendicion di Obispo.
REUNION CU LIDER DI PAR
Tambe Lider di MEP a reuni cu lider, presidente y parlamentarionan di Partido PAR. Aki tambe a discuti riba diferente topico cu e paisnan tin den comun entre otro COHO y señora Evelyn Wever-Croes a duna splicacion Amplio con Aruba ta atendiendo cu esaki.
ORADOR NA EVENTO DI PAR
Señora Evelyn Wever-Croes tawata orador na e evento di Partido PAR di e traspaso di mando di liderazgo di señor Eugene Rhuggenaath pa señor Quincy Girigorie. Den su discurso, Lider di MEP a papia riba e topico “Our future is now” na unda cu el a elabora riba relacionnan den Reino, riba e efecto di Covid riba Aruba, con Aruba a atende cu e retonan aki y con Aruba ta trahando pa recupera nos economia pa asina recobra nos autonomia.
“Mi a splica cu nos a acepta e condicionnan di Hulanda pasobra nos no tawata tin otro alternativa, pero awor nos mester haci lo maximo pa haci di Aruba un pais fuerte bek, mas resiliente y menos dependiente di Hulanda. Den esaki nos ta mira e Landspakket como un oportunidad”, Prome Minister a duna di conoce.
Lider di MEP, señora Evelyn Wever-Croes ta mira atras riba un fin di siman cortico cu reunionnan y encuentronan hopi fructifero. Den number di Partido MEP, Lider di MEP ta felicita Partido PAR cu su lider nobo y ta desea señor Quincy Girigorie tur exito den e funcion nobo cu e ta bay carga den su partido.
