Diasabra anochi, durante un evento ameno, na Renaissance Convention Center, Stichting Casa Cuna Progreso a celebra su di 65 aniversario. Un fundacion cu un rol hopi importante pa pais Aruba. Un fundacion cu ta brinda un hogar pa nos muchanan cu tin un criansa dificil, pero tambe brindanan un segundo oportunidad den bida. Cada mucha merece di experencia cu e ta parti di un famia, comunidad y un hogar, pues danki na e famia di Casa Cuna, tur esaki ta posibel pa 65 aña caba.
Minister di Husticia y Asuntonan Social Sr. Rocco Tjon, tawata presente na e evento di diasabra, caminda a hiba palabra gradiciendo henter e ekipo di Casa Cuna pa nan aporte y trabou cu nan ta haci pa cu nos muchanan. Algun luna atras, a haci un bishita caminda a haya un bista di e facilidad pero tambe a combersa cu e trahadonan. Por a deduci akinan cu e ekipo ta traha cu hopi pasion pa nos muchanan, nan ta brindanan siguridad, amor, atencion y e structura cu nan ta merece.
Banda di esaki, alrededor di tres aña pasa, a habri porta pa mamanan hoben, cu esaki a habri caminda pa e mama hoben por desaroya su mes como un mama responsabel pa e cuido, pero tambe e futuro di dje y su yiu. E punto di salida di e oportunidad aki pa e mama hoben ta, 365 posibilidadnan nobo den bida, y sey ta e motivacion pa un mama hoben acudi na tienermoederhuis bou di capa di Stichting Casa Cuna Progreso.
Por ultimo, e mandatario a expresa cu un edificio bunita y fondo no ta e unico factornan cu ta haci cu un fundacion manera Casa Cuna Progreso ta existi pa 65 aña caba, ta e famia cu tin e tarea pa cuida y e educa nos muchanan aña aden y aña afo ta loke ta haci e fundacion aki uno exitoso. Un pabien grandi na tur esnan cu a haci e 65 añanan aki di Casa Cuna uno existoso, y danki pa a marca e futuro positivamente pa tur e muchanan cu a crece akinan.
