A yega tempo pa nos stop di wak rond , y tuma e asunto di nos hogar y nos hubentud na serio.
Tin hopi hogar destrosa, famia kibra, muchanan rechasa, di cual comunidad tin cu preocupa tur dia pasobra cos a bay for di man.
Ta duro pa expresa cu mayoria noticia negativo ta draai rond di hubentud,y esey ta hopi remarcabel.
Awor caso nan di tiramento no sporadico mas, pero nan a bira semanal, y ta bai den direccion di ta diario, esaki ta algo hopi serio.
Y no ta un asunto politico, pero ta un asunto di educacion y nos tur sa cu educacion ta cuminsa na cas y nos no por sconde , nos como mayor ta prome yama pa tuma un accion di prevencion.
Nos hogar y nos hubentud mester florece, y cu falta di respet, violencia, tiro, hincamento, rabia, odio, orguyo, flohera, zundramento, droga y alcohol etc , no tin ningun clase di crecemento.
Salmo 115 vers 12+13+14 ta bisa: Señor ta corda riba nos y e lo bendiciona nos, E lo bendiciona esnan cu ta teme Señor tanto chikito como grandi, cu Señor haci boso aumenta mas y mas, boso y boso yuinan , cu boso sea bendiciona di Señor.
Cada dia nos ta mira cu locual ta para scirbi den Efesios capitulo 6 vers 1-4 ta esencial pa tur famia, y asina esaki wordo pone un banda, dolor y tristesa ta drenta cas , a yega e tempo pa tur hende , tur hogar, tur famia , reconoce e Palabra di Señor y pone den practica tur dia.
Señor ta bisa den Mateo capitulo 19 vers 14 : Laga e muchanan bini serca mi y no stroba nan di bini serca Mi, pasobra e reino di cielo ta pertenece na esnan manera esaki nan.
Pero awendia hende grandi ta hiba mucha tur caminda cu excepcion di cas di Dios, y ta usa e excuus, si mi yiu no tin gana di bay, mi no por forsa e mucha, awel ata e resultado awor, cu nos tur por mira , pasobra tur locual hende sembra nan lo cosecha.
No tin mihor tempo pa refleciona, arepenti , pidi Dios pordon, y cuminsa haci locual Dios ta bisa cual ta lanta nos yuinan den e Palabra y instruccion di Señor.
Palabra di Dios ta bisa nos den 2 Timoteo capitulo 2 vers 24: Y e sirbido di Señor no mester ta pleitado ma cariñoso cu tur hende, cu capacidad pa siña . Laga nos reconoce den esaki como mayor cu duresa di curazon no ta hiba nos ningun caminda, pero siña y lanta nos yuinan den husticia y amor di Señor ta primordial.
Proverbionan capitulo 14 vers 11 ta bisa: Cas di malbadonan lo wordo destrui, ma e tent di e rectonan lo florese. No laga bo hogar lo wordo reconoce como cas di malbado, como mayor nos mester pone Cristo Hesus na prome lugar den nos hogar.
Nos ta florece ora nos yuda hende florece, ta nos tur tin di duna un man den e asunto aki, e no ta un asunto di placa, pero un asunto di amor.
Respet ta bini for di cas , laga nos no lubida locual Salmo capitulo 1 completo ta siña nos.
Ora nos famia ta estableci den Cristo Hesus nos lo florece y prospera.
Ban yuda nos hubentud Florece y Prospera., pasobra esaki ta deber di tur mayor y un mandato di Dios, E tempo a yega.
