Shonnan tur, un bon dia yen di sabiduria den nos alegria ! Cu hopi gradicimento na Dios den nos curason pa un otro dia mas cu salud, amor, alegria y sabiduria. Y cu hopi inspiracion poetico cu a keda pega na cada curason y alma poeticamente recientemente durante e Anochi di Poesia na Santos Cafe cu excelente servicio. Un dushi publico hopi grandi, “full house”, cu hopi escritor y poetanan presente, cu a presenta nan obra of obranan cu palabranan bibo di sintimento cu ta toca e curason y inspira e alma. Un anochi yen di lus y amor fei cuminsamento te fin. E bunita anochi aki a habri cu dos musico ariba conga tambu tocando diferente sorto di ritmo, como muestra di nan passion pa nan instrumentonan musical. Dos tremendo artista musico ! Danki pa a habri e anochi den e forma dushi aki, acompanja cu un bon splicacion.
Por a sinti un crenchi movecion den e pianan y heupnan di esnan presente, aunke no tawatatin bailamento. Despues e anochi di recita y of declama pa esnan cu ta hasi esaki foi cabes a cuminsa. E anochi unico y inspira aki a start sali cu un di e hobennan cu a expresa su mes den un bunita poema di amor. Ach, como “Grandma Poet” Lady Ruth ainda no ta corda tur e nombernan, pero mayoria bes ta reconoce e caranan y ta sinti e bunitesa di nan curason.
Despues amiga collega Poeta Ariana “Lady Ari” Koolman Chirino elegantemente cu un sombre bisti, a duna su presentacion bunita y unico, compartiendo su poema di anja 2020 di Poeta Patria cu no a continua e anja ey pa motibo di e covid, pero cu despues e comishon Poeta Patria su comishon di corrector di Papiamento a compila tur e poemanan di e anja ey den un buki , cu e Poetanan a ricibi e anja despues, hunto cu e buki di 2021. Tambe Lady Ari a recita su bunita poema di e anja aki 2022 den Poeta Patria, cu a laga nos tur mas inspira cu mas amor pa nos dushi Aruba. Su kerido esposo Michael y madrina Lilian hopi orgulloso di Ari.
Despues e tremendo MC Leo Phillips a yama Grandma Poet Lady Ruth padilanti y nos a recita 3 poema. E prome poema tawata titula “Harmonia” di amiga collega Poeta Gwendy Sneek cu su nomber artistico “Gyzah”, ya den felis memoria algun anja caba, pero awor mas serca di nos mente, alma y curason. Nos a sigui cu e poema na ingles “My friend Aruba” y termina nos presentacion cu “ Dushi Aruba”. Mayoria poema a trata e tema di e anochi aki, cu tawata “Patriotismo”. Asina nos por menciona e.o. cu meneer Mohamed a expresa su mes ampliamente kiko ta un arubiano p’e y kico ta cultura segun su curason cu e toke multicultural. Hopi pero hopi interesante mes ! E publico presente por a gosa di bunita presentacionnan musical tambe di Rocky y di Pearl Dumfries riba nan guitara cantando. Maria Silva Hart a capta tur curason cu su bunita poemanan den e idioma Spanjo cu temanan profundo di Patriotismo, pone nos lananan rijs. E bunita artista Angele Martinez conosi pa saca bunita potret cu su camera a sorpresa tur presente, su debut cu su bunita poema foi cabes. Helena Fornara a recita su poema di Patriotismo y amor pa Aruba y su esposo dfm na e idioma Hulandes, tambe masha bunita mes ! Pero ora Jhon Freddy a sinta confortabelmente riba un stoel y a declama foi su cabes su poema impactante “Mi kier ta”, cu cual e la gana na di segundo lugar den Competencia Poeta di Patria” 2022 , mi gemoed a yena con e ta presenta poeticamente su bunita poema unico cu asina hopi amor, respet, aprecio y passion pa nos dushi isla Aruba, cu ta su cas awor tambe ya pa anjas. John Freddy Tobon Montoya ta hopi conosi, respeta, aprecia y stima pa tur den tur e diciplinanan di arte, como un tremendo bon Poeta, escritor di centenares di cantica, un gran artista su mes, yudando y asistiendo otro artistanan cu nan shownan y of e.o. guiando e hobennan den e actividad anualmente “ Arte di Palabra” entre nos islanan ABC (cu final grandi e anja aki na nos ruman isla Corsou dia 28 di Mei ) y hopi mas. Hunto cu Stan Dabian nan ta e cara y curason di nos Departamento di Cultura DCA, e dos cabayeronan aki ta destaca den nan trabao professional cu curason. Te asina leu un crenchi di nos dushi y bunita “Poetry Night” cu e siguiente capitulo na luna di juli, Dios mediante. Na final di e anochi Lady Ruth Grandma Poet a entrega su buki “Alegria di Ruthy Poema 2” na Leo, Beach y Mr. Milliard cu hopi amor y carinjo. Danki pa lesa nos relato, cuida curpa mente alma y curason, un “Bearhug” pa tur ! Love you too !
