Pa mas di 20 aña caba Fundacion Telefon pa Hubentud Aruba ta dunando informacion, opcion y sosten emocional na nos muchanan y hobennan di Aruba via telefon, internet, charla, workshop y proyecto. Banda di nos muchanan y hobenan di Aruba, Fundacion Telefon pa Hubentud Aruba a cuminsa desde 16 di maart ultimo duna informacion, opcion y sosten emocional na e muchanan y hobenan di e isla St. Eustatius.
Pa medio di e ayudo aki Fundacion Telefon pa Hubentud Aruba ta invertiendo den nos muchanan y hobenan di Aruba y asina ta fortaleciendo caracter y formando muchanan y hobenan resiliente.
Na 2021 caba Aruba Airport Authority N.V. (AAA) tawatin e placer di contribui na un proyecto di Fundacion Telefon pa Hubentud Aruba, esta My Life, My Chance. Door di e contribucion aki AAA a conoce Fundacion Telefon pa Hubentud Aruba mas di serka y kiko tur Fundacion Telefon pa Hubentud Aruba ta haci pa nos muchanan y hobenan. E ayudo cu ta ser brinda na e grupo importante aki den nos comunidad ta sumamente valioso. Door di esaki AAA a dicidi di contribui na un manera mas structural na e trabou cu Fundacion Telefon pa Hubentud Aruba ta desplega y a tuma e paso di ta un di e sponsornan oficial di Fundacion Telefon pa Hubentud.
Na e manera aki AAA kier contribui na e bienestar y salud di nos muchanan y nos hobennan. E ayudo cu Telefon pa Hubentud por brinda nan na un manera anonimo y sigur ta sumamente importante. E trabou cu tur e mentornan cu ta traha na Telefon pa Hubentud ta haci ta wordo haltamente aprecia y ta algo cu sigur merece nos sosten.
“Ta un honor pa nos por colabora cu Fundacion Telefon pa Hubentud Aruba e aña aki y nos lo sigui explora maneranan con nos lo por sigui cu esey den futuro” segun CCO di AAA, Sra. Barbara Brown.
AAA ta haya importante pa Aruba tin ciudadanonan vital y pa nan tin un aporte positivo na Aruba. E ciudadano vital ta ser crea for di chikito den tur siguridad pa asina aki na grandi e por duna parti di e inversion den su persona bek na nos comunidad.
Conhuntamente cu Fundacion Telefon pa Hubentud Aruba, AAA lo ta invertiendo den nos muchanan y hobenan di Aruba.
