E Copa Aruba Bank Liga Plata 5 x 5 den futbol femenino a cuminsa diadomingo ultimo riba e canchanan di mini turf na Estrella y Britannia.
Na tereno di Britannia a tuma lugar dos wega. Den e encuentro inaugural e ekipo bishitante esta La Fama ta gana Britannia cu e score final di 4 – 1. E golnan di La Fama a bini di Kayleen de Cuba cu dos gol, Ciney Flemming cu un gol y Sharaidy Kelly cu un gol. E gol di Britannia a wordo anota pa Zianna Loeftok. Den e di dos wega, Bubali ta gana RCA cu e score di 11 – 1. E hungadornan Rachelle Mora y Tamika Almary tabata esnan cu a produci casi tur e golnan pa Bubali. Rachelle a anota un total di 6 gol mientras Tamika a anota 4 gol. Nageli de Cuba a anota 1 gol. E unico gol di RCA a bini di Natysha Franken.
Riba tereno di Estrella na Sta Cruz, e ekipo di cas esta Estrella 1 a perde 7 – 0 contra di Dakota. Golnan di Dakota a wordo anota pa Sharrienne Vrolijk cu a score 4 gol, e otro golnan a bini di Kynah Kock cu 2 gol y Neyline Reyes cu 1 gol.Den e di dos wega, Estrella 2 ta triunfa riba Riverplate cu e score di 2 – 1. E golnan di Estrella 2 a bini di Marianne Oduber y Akylaah Croes. E gol di Riverplate a bini di Alexa Ramirez.
