Corte den Prome Instancia a trata awe e caso contra tres Bulgaro y un Dominicano cu ta wordo sospecha di skimming cu carchinan di banco na Augustus y September 2021. Skimming ta e uso di un mashin di ATM pa copia carchinan di banco, cu siguientemente ta wordo usa pa saca placa cuentanan bancario di personanan inocente. E caso a bin na cla dor di banconan, cu ta paga tino riba tur cos na un manera hopi skerpi.
Fiscal di husticia a exigi cuatro aña di castigo di prison contra e sospechosonan Bulgaro. Ministerio Publico ta considera cu nan a haci nan mes culpable di computervredebreuk, skimming (falsificacion cu carchinan di banco) y cu nan ta forma parti di un organizacion criminal. Fiscal a bisa cu e ta tuma e sospechosonan na malo cu di tur parti na Mundo, nan a scoge nét Aruba, un lugar unda skimming por tin e consecuencianan mas grave pa comunidad, debi na e dependencia di Aruba riba turismo.
Corte a dicidi awe mes den e caso contra e sospechoso Dominicano. El a wordo condena pa un boet debi na destruccion y a wordo declara liber pa e otro hechonan.
Contra e tres otro sospechosonan Corte lo dicta sentencia riba 14 di april 2022.
