Un biaha mas partido MEP kier resalta e echo cu luna di maart ta e luna di mas importante den henter e lucha di e pueblo Arubano pa su status autonomo den Reino Hulandes. Fuera di e logro di nos Status Aparte durante e Conferencia di Mesa Rondo dia 12 di maart 1983, e inauguracion di nos Himno y Bandera dia 18 di maart 1983, e referendum consultativo dia 25 di maart 1977, e fecha di 26 di maart 1982 ta resalta como un logro pa loke ta e inauguracion di nos Arubahuis na Hulanda.
Den preparacion pa Status Aparte
Asina por mira cu riba e fecha aki e pueblo Arubano a haya un representacion oficial na Hulanda, esta nos Arubahuis cu tabata situa na Paleisstraat, caminda miles y miles di e Arubianonan na Hulanda desde e dia ey por a conta cu un representacion digno cu siguramente a traha na nan bienestar. E representacion aki tambe tabata den cuadro di e vision di nos Libertador Betico Croes y ta forma parti di e preparacion pa e Status Aparte di Aruba. Tambe pa atrae inversionistanan Hulandes y pa promocion di turismo for di Europa, un representacion Arubano na Hulanda tabata hustifica. E representacion ta necesario tambe pa atende asunto di nos studiantenan na Hulanda, percura pa cuido medico pa patientnan cu ta bay busca esaki na Hulanda y atende problemanan social di Arubianonan na Hulanda.
Awe Arubahuis ta situa na Schimmelpennincklaan cual edificio ta propiedad di pais Aruba y cu a ser cumpra na 1994 door di Gabinete Oduber 2.
Organisacion di Arubadag
E tempo ey hopi critica a surgi for di oposicion alegando cu esaki ta malgastamento di placa di pueblo. Pero awe henter comunidad por mira e frutanan cu e Arubahuis na Hulanda a trece cune. Un di nan tambe ta e organisacion oficial tur aña di Arubadag na Hulanda. Asina por mira con e celebracion di Arubadag na 1982 a conta cu asistencia masal di mas di 2000 Arubiano. E opinion general ariba e idea di organisa un dia asina ta hopi positivo, ya cu e Arubianonan biba na Hulanda ta haya e oportunidad pa topa otro y keda na altura di e ultimo acontecimentonan ariba tur tereno na Aruba.
Finalmente e pueblo Arubano por ta orguyoso di institucion di Arubahuis na Hulanda cu a bira realidad danki na e vision di nos estadista Betico Croes.
Pabien Aruba cu e di 40 aniversario di nos Arubahuis na Hulanda.
