Un di e reunionnan cu Parlamento tabatin e siman aki tabata Landsverordering Regeling Consumentenkrediet. Un concepto di ley, adapta door di Minister di Asuntonan Economico, ta uno cu ta pa protección di e consumidor.
Ainda nos no a haya oportunidad pa hiba palabra, pero ta di opinion cu sigur e ley aki ta necesario mirando e meta cu e ta sirbi.
Manera a wordo splica den Parlamento, e ley aki basicamente ta bay regula e porcentahe maximo cu e companianan cu ta ofrece credito por cobra na interes. Tambe lo introduci cierto reglanan con pa preveni e asina yama ‘overkreditering’.
Aunke na e momentonan aki tin background information tumando luga na momento cu haci peticion pa préstamo, e problema ta sinta den e interest halto cu por bay cobra. Esaki ta algo cu Gobierno kier sigura ta controla por medio di un ley. E ta algo cu nos di Parlamento sigur por apoya.
Aworaki tin un gran cantidad di ciudadano cu tin, además di nan credit card, préstamo tambe pa cumpli cu pagonan. Banda di esaki, tin ciudadano tin adicional placa presta cerca personanan individual cu tin biaha ta cobra te cu 25% di interest. Esaki ta e negoshinan clandestino cu ta existi no awor pero for di basta tempo caba.
Esaki ta un preocupación cu sigur ami tambe tin. Demasiado debe ta conduci na hopi problema social. Un famia cu no por cumpli cu nan pago, ta cay den stress cu tur su consecuencianan. Pero tambe ta sosode cu pa cumpli cu debenan, e famia ta keda sin placa, no tin pa cumpra cuminda, no tin pa paga awa y corriente. Y e ta keda manera un circulo vicioso for di cual nan no por sali sin ayudo.
Datonan di Banco Central ta indica cu e ciudadano averahe di Aruba tin un debe basta grandi riba su cuenta. Di loke nan ta gana anualmente, casi 95% ta bay pa paga debe. Un diferencia grandi cu loke tabata conoce den añanan 90 ora cu esaki tabata 67%.
E problema ta cu e ciudadanonan na Aruba ta gasta mas di loke nan tin na entrada y no ta traha a base di un presupuesto. Fin di luna yega, ta paga pero mester bolbe presta y ta difícil pa sali di e situacion aki sin ayudo.
Den e caso aki e ley cu Parlamento ta trata lo duna un man door di limita e nivel di interés cu institucionnan finacniero por cobra na e ciudadanonan. Pero tambe cu ta exigi di e institutonan cu mester splica tur cliente bon cla e producto of servicio cu ta ofrece.
E ley aki lo no bay soluciona tur cos, pasobra debi na circunstancianan mundial prijs di productonan a aumenta drásticamente. Di un banda Gobierno lo mester bay mira formulanan pa yuda mehora e poder di compra di e ciudadanonan. Pero tambe crea un sistema pa encurasha pa nan sali di e situacion penoso cu nan ta aden.
Nos di fracción di MEP lo urgi minister pa e curso nan con pa traha persupuesto personal y familiar continua pa sigi brinda apoyo na famianan di nos Pais
