Salbacion ta esencial, ta e cos di mas importante cual Dios a manda su yiu Hesus aki na mundo pa cumpli cune ( Juan 3 vers 16 -12) .
Pa nos salbacion Dios a entrega su unico Yui pa ken cu kere den djE no bay perdi ma ricibi bida eterna, asina importante e ser humano ta pa Dios.
Salbacion no ta religion, salbacion ta personal, religion no ta salba hende, hende ta salba pa medio di gracia door di fe , y esey no di boso mes e ta don di Dios ( Efesionan 2 ver 8 +9). No resultado di obranan pa ni un hende gaba..
Ningun hende por paga of cumpra salbacion, of haci algo pa hanja salbacion, por ehempel bo por duna cuminda y paña na henter mundo, pero si bo no ta kere den e Yiu unigenito di Dios, bo ta perdi, lo bo no alcansa cielo.
Pasobra e preis di nos salbacion y nos redencion a wordo paga den un biaha riba e cruz na Calvario pa medio di nos Señor Hesus Cristo.
Riba tur locual cu ta material, propiedad, bunitesa, grandesa, estudio etc, nos salbacion ta mas importante, pasobra nos salbacion ta e garantia cu ora nos muri nos lo sosega na paz, pa despues lanta ora Cristo bini.
Pasobra si e palabra di Dios ta bisa den tur bijbel cu esun cu kere ( pone confiansa) lo ta salba, y esun cu no kere( no pone confiansa) lo ta condena y bay perdi.
Esey ta nifica pa nos tur cu esun cu muri sin kere y acepta Hesus Cristo como su Señor y Salabador lo no tin paz , pasobra caminda e ta bay no tin paz ( Lucas Capitulo 16 vers 19-31).
Isaias capitulo 59 vers 2 ta bisa: Ma boso picanan (maldatnan) a causa separacion entre boso y boso Dios, y boso picanan a haci cu Su cara a keda scondi pa boso, y asina cu E no ta tende.
Romanonan capitulo 5 vers 8 ta bisa: Ma Dios ta demostra Su mes amor pa cu nos den esaki, cu tempo nos tabata pecador ainda, Cristo a muri pa nos.
Juan capitulo 1 vers 12 +13 ta bisa: Ma tur esnan cu a ricibiE , esnan cu a acepta E , esnan cu a kere den su nomber y esnan cu a pone nan confiansa den djE, E a duna e derecho pa bira yiu di Dios.No nace a base di sanger ,nan no bira yiu di Dios a base di famia, ni di e boluntad di carni, , pero door di boluntad di Dios.
Romanonan capitulo 3 vers 23 ta bisa: Pasobra tur a peca y ta falta e Gloria di Dios.
Romanonan capitulo 3 vers 10 ta bisa; Manera ta para scirbi no tin ningun hende husto ni sikiera un.
Salbacion ta importante pa nos tur, como mayor bo mester ta interesa den bo propio salbacion y esun di bo famia.
Pasobra esey ta demostracion di amor, boso ta bisa mama y tata ta stima yiu, awor no laga e amor ey keda tey eynan , guia bo yiunan riba e caminda di salbacion for di chiki y na grandi lo nan no lubida.
Salbacion ta importante pa tur hende,(1 Juan 1 vers 9).
Si awe bo lesa e mensahe aki, no haci bo curazon duro, pasobra Dios ta stima bo, habri bo curazon y arepenti y laga Cristo Hesus bin biba den dje.