Den bon colaboracion ku Cuerpo Policial Aruba
E barcu di marina Zr.Ms. Friesland resientemente a logra para un boto di piscado Venezolano sospechoso riba laman grandi. E contacto a keda descubri pa un avion di patruya di Wardacosta Mericano. E boto tawata riba un ruta conosi pa contrabanda despues di cual Friesland a keda dirigi pa controla e boto. Ku e barcu rapido di interseptacion, e FRISC, ku na bordo un ekipo combina di tripulantenan di e barcu y Wardacosta Mericano, e boto a keda persigui. Na yegada di e FRISC den serkania di e boto, esaki a cuminsa zink. Riba esaki mes ora a actua pa trese e pasaheronan a bordo di Friesland. E tripulacion di Friesland a hasi tur intento pa mantene e boto riba awa, pa asina por controla esaki riba contrabanda.
E boto sospechoso a keda di tou pa Zr.Ms. Friesland y hiba Aruba caminda a entrega esaki na Wardacosta su punto di sosten na Aruba, pa por hasi mas investigacion. Pa motibu ku e boto tawata parsialmente bou di awa, e ekipo di buceo di KPA a hisa e boto ku nan materialnan pa asina por a controla esaki. Durante e control riba e boto hasi pa un ekipo di e punto di sosten di Wardacosta na Aruba, un gran cantidat di pakete ku probablemente droga aden a ser haya. E
seis personanan ku nashonalidat Venezolano, y e paketenan a keda entrega na e ‘unit georganiseerde criminaliteit’ di KPA pa mas investigacion den e caso aki.
