E popular grupo di arte ACE Kids Club a lansa un kantika nobo den kuadro di selebrashon di nan prome aniversario i tambe den preparashon pa siman di muzik pa mucha.
ACE Kids Club e ultimo aña a presenta varios kantika pa eduka i entretene nos muchanan.
E biaha aki nan a bin ku un tema pa enfoka riba: amistad i amor. E kantika aki ta skibi pa Aimee Janga ku ta e coach vocal di ACE Kids Club Aimee a keda inspira pa e kansion hit riba Tik Tok ku ta savage love di Jason Derulo. E areglo musikal pa hinka e piesa den un bachi karibense a keda na enkargo di Micheal Bianchi. Huntu ku e piesa aki tambe ACE Kids Club a lansa un video clip. E clip a keda estrena djasabra ultimo riba You Tube. Por skucha e kantika aki na tur radio i por mira e video clip riba You Tube. Djies buska “Amistad -ACE Kids Club” i disfruta di dje.
Keda pendiente pa e selebrashon di ACE Kids Club su prome aniversario ku lo tuma luga di 1 di april pa 10 di april.
Ya ta un aña kaba ku ACE Kids Club a organisa un siman di arte pa mucha i esaki a produsi un mini pelikula/video clip ku a hiba di titulo Corona Free. E aña aki tambe tabata tin e siman di arte pa mucha i durante di e siman ei e muchanan a krea un obra teatral di moveshon i muziek ku a hiba di titulo “Amistad”. Durante di e siman ei nan a traha tambe e video clip i kansion “Amistad”. https://youtu.be/m8E-aKCVA84
ACE Kids Club durante di nan aña di eksistensha a produsi varios hit musikal.
Ata pasku a jega, Corona Free, Mi kurason ta bati pa mama, Mi tata ta kampion, E palu di kuenta, Bo por bira loke bo ke i awor Amistad. Nos a kompronde ku pa e siman di muzik ACE Kids Club lo bin ku mas kantika te asta un den kolaborashon ku e grupo “Zing” di Korsou. Nan ta preparando un show di selebrashon. Pues keda pendiente pa mas informashon.
