Miembronan di prensa, aki mi ta manda un komunikado pa medio di komunikashon pa denunsiá loke ta pasa den R&O/DROB pa asina notifiká pueblo di Boneiru kiko ta pasando na “DROP” aya na Kaya Amsterdam. Mi partner tabata duda si lo a saka e notisia ki si òf no pro ami ta haña ku mester por mirando ku nos ta biba riba un pais demokrátiko.
Mi partner señor David Molina a regresá Boneiru bèk na òktober 2012 despues di a biba 18 aña na Hulanda. E kier a bin su kas bèk pero teniendo e posibilidat ku si e no a gusta e por a bai bek Hulanda. Mayoria di su kolega nan ku tambe a bin e mesun periodo ei pa bin traha na Boneiru a regresá Hulanda bèk. David a skohe na aña 2014 pa keda Boneiru definitivo i a bai inskribí su mes na “DROP” pa asina bin na remarke pa un tereno.
Hañando e informashon for di e tempu ei ku e lista di espera pa tereno pa Playa i besindario tabata 6 aña òf mas a pone ku David a skohe pa e bario nan Nort di Saliña i Rincon.
David su mayornan ta bin tantu di Rincon komo Nort Saliña ta p’esei su eskoho pa e por bin na remarke pa un dje dos bario nan ei.
Meskos ku tur otro persona ku inskribí pa tereno nan mester paga e montante na “Burgerzaken”. David a hasi e pago di $55,87 na “Burgerzaken” riba 21 òktober 2014, kual tabata riba un djamars i a entrega un kopia di su inskripshon sigun instrukshonnan ku el a haña na “pòst en Archief” i unu na e lokèt di “DROP” kaya Amsterdam.
Den fin òktober 2018 pa kuminsamentu novèmber 2018 David ta wòrdu yama dor un empleado di “DROP”. Nòmber nos lo laga afó, pero dado kaso si ta nesesario pa un investigashon, e nòmbernan lo wòrdu menshoná. David ta presentá na “ DROP” i den kantor di e empleado e ta haña tende ku e ta number 2 riba lista pa ku e bario di Rincon i por a bai wak 4 tereno na Rincon, kual dos tabata ñe parti pabou di Rincon i dos e sitio pariba. David por a wak e tereno nan i pensa si e lo skohe un di nan i tabata tin e tempu te ku yanüari 2019 pa por a duna kontesta. Mi persona komo su partner tabata sumamente kontentu i a bai wak e tereno nan i nos a skohe unu, kual tabata keda n’e parti “Pariba” dje bario. Bisindario Kaya Taki.
Na yanüari 2019 nos ta regresá n’e ofisina di “DROP” pa asina duna nos kontesta i ta haña tende di un empleada femenina ku su kolega hamas i nunka mester lo a yama Molina na kantor te pa ku e bisé ku e ta number 2 riba lista te pa e bai wak e 4 tereno nan. Molina mester warda [pasombra awor aki tin 44 persona riba lista di espera anto no ta traha ku number. Riba nos pregunta kon porta ku òktober/novèmber 2018 Molina ta number 2 anto 3 luna despues no sa mes unda e ta para i ta menshoná un kantidat di 44 persona ku ta en espera di un tereno den e bario di Rincon.
Ei nos ta tende ku nos mester warda i “DROP” lo notifiká Molina momentu e bin na remarke pa ku un tereno. Mirando ku nos no por a bisa nada, nos a regresá kas ku e informashon ku “DROP” lo a notifiká David Molina momentu ku e lo a bin na Remarke. Aña 2019 a pasa i 2020 a kuminsá. Na Yüni 2020 David ta den preparashon huntu ku otro boluntario nan pa ku e plataforma di Rincon i ta tende un kombersashon den bario ku 30 persona ta bai haña tereno den e bario Rincon i ku tin persona nan ku ni 2 aña di inskripshon nan no tin a bin na remarke.
David ta hasi un polítiko e pregunta pa ku e proyekto andando den bario di Rincon pa ku dunamentu di tereno i esei ta wòrdu konfirmá i tambe a wòrdu di konosé ken ta esun ku tabata enkargá ku esei.
David Molina a keda straño i a aserka “DROP” pa puntra nan kon porta ku e no a wòrdu notifiká ku tin posibilidat pa bai haña tereno na Rincon i 30 persona lo bai bin na remarke, kual algun a kuminsá haña kaba.
Molina na su turno a pidi si e por a haña un kopia di su inskripshon ku la entrega na òktober 2014 i a haña tende ku nan ta mira den e sistema ku na aña 2018 el a inskribí/hasi petishon i awor nan ta tratando inskripshon nan di aña 2016 i David Molina mester warda te ora su turno yega.
Mi partner a bira furioso i a bisa ku e kos ei no ta korekto pasombra el a entrega su dokumento nan sigun instrukshon nan haña e tempu ei. El a entrega tantu un kopia na “pòst en archief” i unu na “DROP”. Si nan lo no tabata entrega, kon por ta el a wòrdu yama dor dje empleado di ‘DROP” na òktober/novèmber 2018 asina el por a bai wak e 4 tereno nan na Rincon. E empleada a keda bisa ku e ta mira den sistema ku ta 2018 Molina e inskribí.
Mi partner tabata hopi desapuntá pasombra el a bisa mira kon el a entrega dos kopia si warda unu pa su mes. Ei mi partner a bin kòrda ku e no a paga cash pero a swipe na “Burgerzaken”. Esei kiermen aunke ku e bon a bai ku e inskripshon e por wak via su bank statement nan di MCB tòg. Esei a pone ku David a bai i buska. El a puntra un empleado mes di “DROP” kiko tabata e suma ku mester a wòrdu paga pa inskripshon momentu ku bo kier bin na remarke pa tereno den aña 2014 i a haña e kontesta den $56 dòler ney. David a buska i kontra ku 21 òktober 2014 e ta paga e suma di $55,87 na inskripshon.
Mesora e ta tene kontakto ku “DROP” i ei kada bes ta bisé ku ta yam’é pero no ta hasié. Mirando ku mi partner tin un kurason pa ku su bario i ta un hende ku ta hasi algu pa su próhimo no kier a trese e situashon aki dilanti i a skohe pa warda n’e momentu ku e lo a wòrdu yama. Esei no a sosodé poniendo ku el a manda un mail poniendo un kopia di su bank statement kaminda ayera, djamars 15 mart 2022 e tabata tin un sita ku un empleado di “DROP” kaminda a mustr’é dos tereno ku e por a bai wak. Mirando e sitio dje dos tereno nan, Molina por a saka afó ta sitio nan kaminda roi grandi ta pasa momentu ku tin yobida. Molina a puntra dikon e no por bin na remarke n’e otro kavel nan den Rincon i a tende ku esei nan ta den tómbola kaba. Molina a sinta i pensa si na òktober/novèmber 2018 e tabata number 2 kon porta e no ta den e tómbola pa ku e tereno nan bon situá den Rincon.
Durante e kombersashon di djamars 15 mart 2022 mi partner David Molina a mira un stèmpel di “DROP” ku e teksto “ may 02 2018 Dir R&O afd. Realisatie.
Molina a drei puntra e empleado: “Ken ta paga un inskripshon 4 aña promé ku e hasi petishon pa bin na remarke pa un tereno”. E empleado a mira Molina i hisa su skouder nan na laira bisando: Molina ami no por duna bo e kontesta ei. Pa mi partner esei tabata e momentu ku e ta bisa ku e a bin e lugá aki bek pa traha pa su pais i duna su aporte na e pais, pero su mes hende nan ta bòikòt e.
Ta p’esei ami komo partner di David Molina kier pa Boneiru i mundu henter sa den ki situashon mi partner ta pasando awor pa ku binimentu na remarke pa un tereno. Un persona ku semper a kere den e aparato gobermental pero ku ta hopi desapuntá mirando kon kos nan a bai pa ku su inskripshon.
Si mi ta robes mi diskulpa na e pueblo Boneriano pero mi lo kier wak dje 30 persona nan ku a haña tereno i esnan ku ta den tómbola pa e tereno nan bon situá den Rincon ki dia nan a paga e suma di inskripshon na burgerszaken i e fecha ku nan a entrega e inskripshon.
Aki mi ta pone un kopia ku ta ilustrá e pago i un kopia dje potrèt ku Molina a saka dje stèmpel ku fecha ku tabata tin riba e dokumento ku e empleado di DROP tabata tin. Molina a mira ku e empleado mes a keda boka habri sin por a kontesta Molina su pregunta.
