TCB ta informá
Tourism Corporation Bonaire den koperashon ku Caribbean Journal, ta anunsiá su programa kompleto di aktividat di e promé Siman di Ròm Boneiru di 14 pa 17 di yüni 2022.
Siman di Ròm Boneiru ta un festival ku ta pone e mihó ròm ‘premium’ di den region karibense i e moveshon gastronómiko vibrante di nos isla den spòtlait.
‘Boneiru a bira un di e mihó destinashonnan gastronómiko di region karibense ku un kolekshon impreshonante di restorant di klase mundial i un kantidat di bar ekselente’, segun Alexander Britell, redaktor i editor di Caribbean Journal ku ta ko-organisadó di e evento ku Tourism Corporation Bonaire ta organisá. ‘Ku Siman di Ròm Boneiru nos ta selebrá ròm komo un bibida stèrki artesanal ‘ultra-premium’ ku e isla fantástikamente bunita akí komo bèkgrount.’
A plania Siman di Ròm Boneiru di 14 pa 17 di yüni 2022 ku un seri di evento ku ta duna bishitantenan i nos poblashon lokal e oportunidat pa purba algun di e mihó ròmnan di region karibense i gosa di e kultura kulinario di Boneiru.
E programa di siman
E evento ta kuminsá dia 14 di yüni 2022 ku un fiesta di apertura ku Rum Papiamento na Rum Runners. E ta kontinuá dia 15 di yüni 2022 ku un prufmentu di ròm estilo ‘rum-on-the-beach’ na Plaza Beach Resort i un kompetensia di kòktel na Tiki & Co.
Dia 16 di yüni 2022 e talentoso shèfkòk Britt Thomassen di Harbour Village Beach Club ta prepará un lùnch di ròm, siguí pa un Happy Hour na Buddy Dive ku e famoso Clifton Estate Rum for di e isla karibense Nevis.
Dia 17 di yüni 2022 parti mainta tin un seminario tokante prufmentu di ròm pa bartèndernan lokal. I despues ta sigui e punto kulminante: e sena final di Siman di Ròm Boneiru na Brass Boer, e establesimentu karibense di e tim kulinario di tres strea Michelin di Johnny i Therèse Boer, siguí pa un anochi ku un kombinashon di ròm i sigá di Papa’s Pilar’s na Delfins Beach Resort.
‘Nos ta kontentu pa mira kuantu partner ta interesá pa forma parti di e promé Siman di Ròm Boneiru’, asina Tourism Corporation Bonaire ta bisa den un deklarashon. ‘Organisando e evento akí nos ta profilá Boneiru komo mas ku solamente un destinashon pa sambuyá i nos ta duna nos bishitantenan e oportunidat pa eksperensiá Boneiru den un otro forma. Nos ta anhelando na un siman dibertido kaminda tantu nos bishitantenan komo nos poblashon lokal por meskla ku otro i gosa.”
Mas aleu Caradonna Adventures ta e partner ofisial di biahe di Siman di Ròm Boneiru kaminda nan ta bende pakete spesial pa eksperensiá Boneiru durante henter e siman. E partnernan hotelero di Siman di Ròm Boneiru ta entre otro Delfins Beach Resort, Harbour Village Beach Club, Plaza Beach and Dive Resort Bonaire, Captain Don’s Habitat, Buddy Dive Resort, Bellafonte Bonaire i Bamboo Bonaire.
