Buelo dos biaha pa siman for di Brussel pa Boneiru ta kuminsá na novèmber 2022
Dia 14 di mart Air Belgium a anunsiá ku nan lo inkluí Boneiru komo destinashon nobo den e skema di wenter 2022/2023 ku un buelo regular direkto for di Brussel Airport (BRU). For di kuminsamentu di luna di novèmber 2022 Air Belgium lo ehekutá un buelo triangular BRU-BON-CUR-BRU, kaminda ta aterisá na Boneiru komo e promé stòp riba e ruta for di Brussel.
For di 4 di novèmber 2022 kada siman ta sali un buelo riba djabièrnè i djadumingu pa 9:15 or for di Brussel (BRU) i ta aterisá pa 15:05 or na Boneiru (BON). E buelo di regreso ta sali pa 16:05 or for di Boneiru i ta yega Brussel pa 8:35 or. Ta ofresé e buelo akí durante henter aña komo buelo regular ku e A330 NEO, un avion di e generashon nobo ku ta kombiná prestashonnan ekológiko i ekonómiko ku mas komodidat pa pasahero.
“Engrandesé nos ret aéreo oropeo i atraé un biahero di balor kualitativamente haltu ta partinan di nos plan di rekuperashon pa turismo, riba kua nos ta traha ku hopi pashon”, asina Miles Mercera, direktor di Tourism Corporation Bonaire a bisa. “E konekshon aéreo akí ta un oportunidat úniko pa habri merkadonan nobo na Bélgika i pa duna mihó servisio na otro gruponan di enfoke oropeo, inkluyendo hulandesnan den e regionnan mas na sùit i biaheronan aleman.”
“Nos ta sumamente kontentu ku e kolaborashon ku Air Belgium i nos ta mira esaki komo un señal ku Boneiru su balor ta birando kada biaha mas konosí den otro partinan di mundu”, segun diputado Hennyson Thielman. “E buelo regular direkto for di Brussel pa Boneiru ta un paso importante den nos vishon ekonómiko pa atraé merkadonan oropeo nobo ku turista ku tin un nivel mas haltu di gasta sèn, entre otro e merkadonan belgikano, franses i aleman.”
