Nos ta tumando nota di oumento di preis di kombustibel komo konsekuensia di e guera entre Rusia i Ukraina. E efekto aki ta afektá nos tambe komo pais i nos ta di opinion ku mester aktua pa trese un solushon pa por mitigá e efektonan.
Pa frakshon di MAN ta importante pa huntu traha i yega na solushon praktiko ku lo tin efekto posítivo.
Frakshon di MAN ta proponé pa gobièrnu baha e akseins i/òf un di e “schakel”nan di OB. Esaki lo yuda sigur den e kalkulashon di preis di kombustibel pero tambe di utilidat(awa i koriente).
Na e momento aki nos konose 41 sèn di akseins riba kada liter di gasolin. Tambe tin den e komponete di preis 6% OB “groothandel” ku ta ora Curoil ta bende ku e pòmp i 6% “kleinhandel” ku ta ora e kliente kumpra na pòmp. Esaki ta generá mas o menos 67 mion pa kaha di gobièrnu. Nos ta mira ku tin otro paisnan ku tambe a pensa riba e desishon aki komo medida pa baha gastu di kombustibel i mitigá oumento di kosto di bida drástikamente.
Un oumento riba gasolin i otro produktonan petrolero ku lo nifiká un oumento di awa i koriente lo oumentá kosto di bida i kosta di hasi negoshi drastikamente. E efekto riba kasnan di famia lo ta negativo i negoshinan ku por reflehá negativamente riba kupo di trabou.
Frakshon di MAN ta spera ku gobièrnu lo konsiderá e proposishon aki komo unu pa duna alivio na komunidat i mitigá e efektonan di oumento gasolin i otro produktonan petrolero ku lo redunda den oumento di kosto di bida pa pueblo kompleto.