Parlamentario Nita, akompañá pa koleganan di koalishon, Braam, Carolina, Mercelina, Seferina, Thode i Yung a bishita CDM holding i Damen shiprepair Curaçao dia 9 di mart último. Motibu di e bishita ta e echo ku gobièrnu di Korsou ta evaluando koperashon/kontrakt entre CDM holding i Damen. Damen ta operando nos “dok” for di aña 2017. E kompania Hulandes en kuestion ta hür i hasi negoshi riba waf di Korsou i tin indikashon ku tin defisiensianan pa loke ta
trata mantenshon i siguridat di e trahadó di nos astiero. Parlamentario Nita ta di opinion ku mester salbaguardia i trese klaridat riba futuro di “dok”, pa salbaguardiá kontinuidat di aktividat riba e tereno marítimo i tambe pa garantisá pan di mas di 300 trahadó.
Despues di e bishita inisiá pa parlamentario Nita, por konkluí ku nos astiero (waf) mester di invershon más pronto posibel en espesial pa garantisá siguridat i mantenshon nesesario pa trabounan por sigui na un forma satisfaktorio pa klientenan rònt mundu, ku ta bin hasi mantenshon òf reparashon di nan barkunan. Nos astiero ta unu perfektamente stashoná den Karibe ku un balor agregá pa kresementu di ekonomía di nos pais. Tumando na kuenta ku ya Korsou no por permití pèrdè más pilar ekonómiko, esaki ta trese kune ku mester atenshon i klaridat riba futuro di aktividatnan den “Damen”.
E kiebro di CDM (“Curaçao Drydock Maatschappij”) a kosta pais basta plaka pa motibu di falta di tomo di desishon di gobièrnunan di turno i mester evitá pa yega einan atrobe. CDM holding, ku ta un NV di Gobièrnu, t’ei pa garantisá desaroyo, invershon i interes di Gobièrnu komo akshonista. Parlamentarionan a atkeri informashonnan bálido serka sr. Caldera, direktor general di CDM holding tokante situashon aktual di nos “dok” I tambe e 4 otro kompanianan ku
ta kai bou di e “paraplu” di CDM holding. Un danki na CDM Holding i tim di maneho di Damen pa a habri porta pa duna nos un bista I tambe informashon manera solisitá. Por konkluí ku den e último 2 añanan no ta notando invershon, konsekuentemente tin hopi ekipo kibrá i for di servisio. Barkunan ta drenta ku yen trabou pa hasi pero pòmpnan di dòk ta kibrá, kran-i generatornan den mal estado. Na lugá di invertí pa drecha esakinan kompania ta opta pa hür i saka kantidatnan grandi di sèn.
Mantenshon di astiero no ta sosodé, kual tin un efekto negativo tambe riba relashon ku klientenan. Tin hopi plan riba mesa, tin desaroyonan riba tereno di holding ku a tuma lugá, pero esei no ta kita ku gobiernu mester pone atenshon mas pronto posibel riba vishon i futuro di nos industria marítimo.
E situashon ta unu di preokupashon i pa e motibunan ariba menshoná ta hasi minister di ekonomia, Ruisandro Cijntje, e siguiente preguntanan
1. CDM Holding i hunta di komisario a raporta na gobièrnu tokante status di “partnership” ku
Damen?
2. Gobièrnu tin atenshon pa e indikashonnan ku ta kologá tokante situashon prekario di astiero ku
aktual ta operá pa Damen?
3. 5 aña a pasa, gobièrnu a evaluá si e partner operashonal ta kumpli ku invershonnan i akuerdonan
hasí den inisio?
4. Ki ganashi/ benefisio Kòrsou a logra den e último 5 añanan di hür nos astiero?
5. Kiko ta e akuerdonan (kontrato) ku Korsou tin ku Damen? – Gobièrnu komo akshonista tin e
impreshon ku Damen lo por sigui garantisá kuponan di trabou?
6. Gobièrnu ta dispone di plan pa invertí den nos astiero?
7. Tin un “bedrijfsschool” riba tereno di nos astiero. Kon lo maneha esaki optimal pa krea mas
trahado tékniko pa e industria marítimo i konsekuentemente krea kuponan di trabou?
Sperando ku Minister lo kontesta nos karta den e tempu definí den e protokòl firma entre gobiernu di Kòrsou i Parlamento.
