Enconeccion cu dia internacional di hende muher Parlamentario drs. Mervin Wyatt-Ras ta felicita tur hende muher y nan famia ariba e dia conmemorabel aki.
Un dia cu mundialmente ta ser celebra dia 8 di maart pa reconoce logronan social, economico, cultural y politico di e ser femenino. Ya desde anja 1910 durante un conferencia di hende muher trahado na Copenhagen sra. Clara Zetkin a lansa e idea pa un dia internacional di hende muher y desde 1911 ta celebra e dia aki y ta haci uso di oportunidad pa curasha accion efectivo pa avanse y reconocimento di hende muher.
E lucha pa igualdad di hende muher ta continuo. Por bisa te ainda mundialmente hende muher ta biba y sobrevivi den circunstancianan menos favorable, hende muher ta ser discrimina, abusa y maltrata sin cu e por pone un paro na esaki. Den paisnan Latino Americano y di Caribe e Gender Gap ta aun mas grandi cu den paisnan Europeo.
Na Aruba tin un cantidad di logronan of cambionan positivo na favor di e ser femenino y tin tambe un cantidad di retonan. Den anjanan setenta a cambia ley pa haci posible cu hende muhernan casa por a keda traha den gobierno. Na anja 2003 a introduci cambio di ley di stalking y e cambio di Codigo Penal pa hisa castigo y pone boet pa abusadornan di mucha/hende muhernan. A bin proteccion di hende muher pa loke ta trata abuso sexual den matrimonio y pa esnan cu ta haci trabou di prostitucion. Na anja 2008 a cambia e Codigo Civil y e ley di SVB pa amplia e Verlof di Embarazo y Parto pa 12 siman, dunando e hende muher mas tempo cu su baby prome y despues di parto y a bira posibel cu e mama trahado despues di parto por cria su baby cu lechi materno na pia di trabao of cu e por kolf lechi na trabao pa por cria su baby. Tambe a haci posibel pa e ser femenino por a haya mas pago ora di malesa. Wyatt-Ras como iniciador di diferente di e leynan pa mehora posicion di hende muher ta remarca cu no tabata facil tampoco pa convence otronan pa sali na defensa di e ser femenino. Entre 2011-2013 a cambia leynan laboral cu ta beneficia tambe e hende muher. A bira alabes posibel proteccion di hende muher contra acoso sexual. Tambe a lanta un Buro dedica na empoderamento di e hende muher. E buro aki awor yama CEDEHM.
Segun Wyatt-Ras por constata cu durante ultimo 15 anja mas mucha muher ta caba skol di nivel mas halto en comparacion cu mucha hombernan y por nota cu mas mucha muher ta bai studia den exterior y ta caba nan estudio. Notable ta alabes cu hende muhernan mas y mas ta ocupando puestonan halto den nos comunidad. Den Parlamento 38% di e parlamentarionan ta ser femenino. Di nan mayoria tin un educacion di nivel halto. Wyatt-Ras kende na dos ocasion tabata presidente di Parlamento di pais Aruba, como e prome hende muher den e funcion aki y tabata un di e prome parlamentarionan independiente di pais Aruba ta comenta cu mas halto hende muher yega na top di maneho mas isola bo tin chens di bira dor cu e exigencianan ta mas halto pa e ser femenino. Si bo tene bo mes estricto na regla bo ta mucho streng y hasta frustra, si bo ta carinjoso bo ta mucho suave y hende por pasa riba bo of hasta ta bisa cu bo no lo ta sirbi. Apesar di esey e hende muher mester keda su mes y haci loke e tin cu haci pa logra metanan di eguidad di genero den comunidad y enfrenta adversidadnan y asina crece.
Apesar di e desaroyo positivo, tog tin mas hende muher cu hende homber ta traha den e sector cu ta menos paga. Hende muhernan ainda ta haci trabounan cu ta ser considera pa hende muher, manera e.o. werkster, administracion, educador y trabounan social. Tambe tin mas hende muher cu hende homber ta victima di maltrato, abuso (sexual), violencia domestico y acoso sexuel. Te ainda ta pensa cu ora un abuso of maltrato tuma lugar ta e hende muher of mucha muher mes por a buska. Pues tin un trabou grandi pa haci pa sigui concientisa tanto hende muher como hende homber y trece cambio di mentalidad cu ta haci y por evita cu hende muher ta sinti su mes y ta wordo trata inferior na e hende homber.
Ya cu e anja aki dia internacional di hende muher tin e tema pa kibra e stigma of “break the bias”, ta tarea di henter comunidad pa yuda elimina prejuicio y stigma contra hende muher. E prejuicio aki ta pone cu ta juzga hende muher apesar di con bon nan ta studia y con competente nan ta. Te rekeri henter comunid pa realisa esaki y trata e hende muher como un ser humano digno cu tin mesun derecho cu hende homber. Ademas skolnan y comunidad tin un rol importante den esaki. Nos tin cu sinja nos futuro generacion respet pa e ser humano sin distinccion y logra cambio di rolnan cu ta ser otorga na e mucha homber y mucha muher for di chikito. Ta cuminsa na cu mucha homber mester por mag di yora y bisti na rose y mucha muher mester mag di ta fuerte y bisti blauw, segun Wyatt-Ras.
Despues di COVID ta necesario alabes pa bolbe ubica nos sernan femenino riba mercado laboral. Lo mester ofrese posibilidad di upgrading pa nan ta bon prepara pa nan trabou y duna sosten financiero pa pago di centronan di cuido. A bira tempo pa comercio coopera cu comunidad pa facilita educacion sano di yiunan di nan trahado y ofrese oranan cu mamanan por participa na eventonan di skol of cursonan encuanto educacion di nan yiu. A bira tempo tambe pa mamanan haya oportunidad di traha parttime y pa haya oportunidad di atende cu asuntonan di skol di nan yiunan.
Ta necesario alabes pa trata e ley di cambio di kindercentra. Un ley cu na anja 2017 a ser aproba den Parlameno y ta den espera di su implementacion.
Alabes ta na su lugar pa mehora e Trai Merdianan y haci posibel manera antes cu ta duna huiswerkbegeleiding pa asina facilita mamanan cu tin un peso hopi grandi como trahado y mama.
Wyatt-Ras ta spera cu nos por sigui traha den e direccion aki y cu den futuro lo por tin mas logro pa cu nos hende muhernan. En especial mirando nos situacion financiero-economico e ser femenio lo por ser afecta mas. Ta necesario proteccion di e mayor soltera cu tin dobbel tarea como trahado y educado. E lucha aki ta sigui y siguramente e tin cu continua conhuntamente of man den man cu e ser masculino.