Na 2019 e Ministernan di Cultura di e paisnan den Reino a explora e posibilidad pa intensifica e cooperacion cultural entre e 4 paisnan den Reino. Den cuadro di esaki e paisnan a palabra pa bay traha hunto riba 4 tereno di cultura: 1. Crea un fondo pa stimula y aporta na proyectonan di investigacion y documentacion riba e tema di cultura y historia di e parti Caribense di Reino. 2. Traha un plan di Educacion di Cultura riba tereno formal y informal den Reino. 3. Implementa e Convenio pa Salvaguardia Herencia Cultural Intangibel y 4. Prepara e peticion pa por ratifica e Convenio pa Salvaguardia Herencia Cultural Sub-Aquatico. Aruba ta ‘trekker’ pa e trabounan pa Fondo di Cultura y Educacion di Cultura.
E pandemia a pone cu e Ministernan no por a reuni mas den persona durante 2020 y 2021, y pesey awor cu tur Pais den Reino a flexibilisa, Hulanda a tuma e iniciativa pa organisa e consulta riba nivel ministerial pa e mandatarionan por bolbe topa den persona cu otro pa concretisa e trabounan necesario.
Banda di e compromiso di 4LO, Minister Maduro ta reuni cu persona y instancia pa e trabounan riba e tereno di finansa.