Projecto Hunto Grandi Grandi Hunto (HGGH) di Fundacion Movemento ta Bida (FMTB) hunto
cu SETAR y cu sosten di CEDE Aruba den 2021 a brinda e tayer “Desaroyo Continuo & Digital 60+” na diferente miembro di gruponan social di hende grandi .
E personanan aki na nan turno a pasa e informacion ricibi na diferente lidernan di gruponan 60+, e.o. den barionan Savaneta, Santa Cruz, Bubali, Oranjestad y Dakota.
Despues a sigui un tayer pa interesadonan, cual a wordo ofreci den barionan San Nicolas, Paradera, Noord, Dakota, Oranjestad y na Cas di OPPA.
Mirando cu durante 2021, pa motibo di COVID 19, no tawata responsabel pa tuma un gran cantidad di interesado den cada tayer, a opta pa tene e cantidad limita. Sinembargo a constata cu e interes y necesidad ta grandi ainda serca nos adultonan mayor, mirando e pregunta pa un siguiente oportunidad.
Ta pa e motibonan aki, cu durante 2022, SETAR hunto cu proyecto HGGH y FMTB, ta sigui cu tayernan, parti den fase, pa yuda na e formacion di nos adultonan mayor den nos era digital.
E prome fase lo ta un tayer pa prepara guiadornan/instructurnan.
Pa e fase aki ta busca personanan cu ta dispuesto pa fungi como guiador/instructor preferibel personanan di 60 +, ta flexibel den tempo, cu transporte propio, y cu lo mester traspasa e informacion cu nan risibi, pa otro gruponan y of personanan.
E tayer aki lo inicia riba diamars 5 april, den edificio di Setar na Ser Blanco y lo por inscribi te dia 15 di maart. Den e fase aki lo tin oportunidad pa maximo di 15 persona cu por participa y wordo forma como guiado/instructor. Lo concentra riba conoce bo smartphone, uzo di e emergency icon, uzo di Whatapp y Youtube. Informacion di e siguiente fasenan lo wordo duna asina cu e prome fase termina.
Por inscribi via tel 6419272, di 8:00 te cu 12:00pm
Inscribi na tempo pa bo lugar ta garantisa.