Nos ta den nos luna cultural, e luna di Maart, nos luna di nos dia di hymno y bandera riba un gran celebracion cu nos Dia Nacional aki varios dia. Y nos ta den e siman di celebracion di Dia Internacional di Hende Muhe cu ta tur anja dia 8 di Maart.
Ya caba e nombernan di e cantantenan ganador di “Un Canto pa nos hymno y bandera”,”Un canto pa Aruba” ta conosi ?. Nos pabien na cada un cu a participa y nos pabien na tur e ganadornan. Boso tur cu a canta a hasi esaki cu amor pa nos dushi isla y ta pesey boso tur ta ganador di e curason, aprecio y respet di pueblo. Mientras nos tur ta en espera pa nos Dia Nacional, nos, hende muhenan, a cuminsa celebra nos dia cu atencion extra pa nos mes. Tawatatin varios actividad di un dushi desayuno aki aya, y manera ta e tradishon, e anja aki tambe Centro di Bario Playa Pabao, ta tene su actividad anual pa nos muhenan bunita,fuerte,sabi y inspira. Despues nos lo bin cu e relato di e actividad bunita aki .Mientrastanto nos por comparti un bunita actividad di musica y canto cu a tuma lugar den Huchada cu e dushi banda “Ruben & Friends” cu canto hopi bunita di Jeanine y Ruben mes. Ruben ta e ruman homber di e.o. Desiree, Miriam y Yolanda Croes, Yolanda cu ta hopi conosi pa su bukinan cu ela skirbi, e.o. esun titula :”Unda bo ta Mami ?” Lady Ruth no tawata sa kico tawata sper’ele, pero asina cu ela yega, e por a sinta na mesa hunto cu dos sra. bunita y elegante, un crenchi mas grandi cu ne caba den edad, pero cu un alma hoben, bunita yen di bondad y bunita energia. Maria y Elena ambos ta toca guitarra y of ta canta tambe den e grupo “Brindis Musical” bau supervision di sra. Maybeline Arends Croes fin di anja y na ocasionnan special, Maybe cu ta conosi pa nos tur pa su coro y cantantenan un crenchi mas hoben. E ambiente den Huchada tawata tremendo ! Un “full house” cu amantenan di e bon musica y canto di nos mesun dushi hendenan. Nos por a goza di e canticanan “Mi kier sa”, “Ayo mi Dudu” y mas na nos dushi lenga materno Papiamento, pero tambe di “Hotel California” y cantica di Bob Marley y hopi mas.
“Ruben & Friends” a toca non stop pa 2 ora y pico. Nos por a tuma nota di un grupo di damanan energetico cu hopi harimento, gozando di bida y di e dushi atardecer cu a conose un yobida suave pa varios minuut. Un bendishon di awasero den e cayente di solo, algo unico, kizas tin di haber cu e cuenta bon studia ultimamente di “global warming”. Nan tawata celebrando e cumpleanos di e bunita y sympatico Melva, cu tempo di su tempo tambe tawata un lider den e grupo scout Santanero na Dakota. Nos tur hunto a canta Happy Birthday pa Melva. Lady Ruth su celebracion a cuminsa caba Diabierna anochi, ora Lady Ruth y su esposo a bai keiro na Plaza Betico pa scucha Edjean y su orkesta y eynan a saborea dushi funchi cayente cu keeshi raspa ariba dje y bebe awa di lamoenchi . Diasabra mainta nos a treat nos mes cumprando algun bon buki na e grandioso tent-sale na Boekhandel Van Dorp den curason di Dakota tur dia!.
Lady Ruth a sigui celebra su Dia di Hende Muhe Diasabra atardecer durante oranan di Happy Hour cu Koffie, snacks y bolo na Huchada. E pre celebracion, antesala di nos Dia Nacional cu a cuminsa Diabierna anochi riba Plaza, a sigui cu e competencianan di canto Diasabra y Diadomingo anochi ariba Plaza Betico. Nos Dia Nacional ta wordo celebra en grande den e luna aki, y nos Dia di Hende Muhe tambe, aunke tur dia nos ta stima nos dushi Aruba y nos mes.
Nos, hende muhe, ta unico, nos so por bira Mama y nos so por duna lechi pechu. Nos ta finalisa cu nos haiku :” Un Hende Muhe…amor ta brota di dje…ta pesey..cuid’e “. Shonnan tur, cuida curpa. Sigui traha riba bo balans mental, emocional y spiritual. Stay safe, love you too !
